O PPdeG pide a "mellora urxente" da N-120 e que reactiven o proxecto da autovía A-76

O Partido Popular de Galicia demanda ao Goberno central a "mellora integral" e "urxente" da N-120 para reducir os riscos en seguridade viaria e a súa "falta de funcionalidade", así como a reactivación das obras de construción e posta en servizo da A-76 (Ponferrada-Ourense).

A través dunha proposición non de lei rexistrada esta semana no Parlamento de Galicia, os populares solicitan a "reparación urxente" da N-120 para avanzar na mellora integral da vía, cun firme deteriorado, así como "a implantación de terceiros carrís de adiantamento".

En particular, reclaman ao Goberno central que actúe nos tramos especialmente deteriorados e garanta as condicións de seguridade e viabilidade en todo o percorrido de "a principal vía de conexión entre o sur da provincia de Lugo e a zona máis oriental de Ourense".

A deputada popular Raquel Arias afirmou que toda a estrada, "desde a súa entrada en Galicia por Valdeorras ata a súa chegada ás cidades de Monforte de Lemos e Ourense, presenta deficiencias no firme, pero hai tramos nos que a sucesión de gretas e fochancas leva a extremar o coidado".

Esta situación, engadiu, provocou que as últimas semanas fosen "especialmente negativas en canto á sucesión de accidentes na vía", moitos deles vinculados ao mal estado do firme como o sinistro múltiple que tivo lugar entre Monforte de Lemos e A Pobra do Brollón ou o accidente mortal acontecido en Quiroga.

Paralelamente, na iniciativa parlamentaria tamén se solicita reactivar, tanto desde o punto de vista técnico como económico, as obras de construción e posta en servizo da A-76, autovía Ponferrada-Ourense, como itinerario alternativo para a mellora da comunicación e da vertebración das provincias de Lugo e Ourense, e destas coa Meseta.

Raquel Arias