Decepción dos alcaldes tras reunirse con Comesaña que recoñece que "faltan 24 médicos"
O conselleiro de Sanidade reúnese cunha vintena de alcaldes da área pontevedresa.
Por Europa Press / Redacción | PONTEVEDRA | 26/01/2023 | Actualizada ás 23:33
Os alcaldes de PSOE e BNG do distrito sanitario de Pontevedra expresaron a súa "decepción" tras reunirse este xoves co conselleiro de Sanidade, Julio García Comesaña, para abordar as dificultades asistenciais da área e a falta de médicos, co foco posto na Atención Primaria. O encontro do conselleiro con 20 alcaldes da área celebrouse na Delegación Territorial da Xunta en Pontevedra e prolongouse durante máis de tres horas.
García Comesaña aclarou que "a poboación galega pode estar tranquila que ten unha atención sanitaria de calidade". "Mellorable, sen dúbida. Todo se pode mellorar", recoñeceu, antes de engadir que é algo no que traballa a súa Consellería.
O conselleiro expuxo as medidas postas en marcha pola Xunta. Entre outros datos dixo que na área sanitaria de Pontevedra traballan 265 persoas máis nos últimos cinco anos --"coma se engadísemos un hospital comarcal"-- pero recoñece que "no ámbito da atención primaria fáltannos un número de médicos que nos gustaría que fose menor", concretamente, faltan 16 facultativos nos Puntos de Atención Continuada e 8 en atención ordinaria --en total, 24--. Estas "ausencias" cóbrense cun "esforzo grandísimo" do resto do persoal "todo o que está na nosa man, facémolo", asegurou.
"PROFUNDA DECEPCIÓN"
Cunha "profunda decepción" saíu o alcalde accidental de Pontevedra, o socialista Tino Fernández, deste encontro que "acabou sen avances ou solucións á actual crise". O alcalde de Pontevedra, Miguel Anxo Fernández Lores non acudiu á cita porque estaba nun congreso en Portugal, no seu lugar asistiu Tino Fernández que criticou que o conselleiro viñese a esta cita cos alcaldes "con datos" que, ao seu xuízo, "contan unha realidade paralela á que existe". "Que se poña as pilas e atenda e entenda o que a xente está a demandar", esixiu.
O alcalde de Sanxenxo, do PP, Telmo Martín, comentou que "todas as áreas sanitarias de Galicia están mellor que a de Pontevedra. Temos que saber que é o que pasa aquí" e preguntou ao conselleiro como podían colaborar os concellos "para atallar este problema canto antes".
Máis positiva foi a alcaldesa de Marín, do PP, María Ramallo que afirmou que as medidas adoptadas pola Xunta "están a empezar a dar os seus froitos" aínda que "hai sitios mellores e outro peores" pero "ao final son as medidas que hai".
Contundente foi o rexedor do Grove, José Cacabelos que ao saír da reunión co conselleiro dixo que o encontro foi "totalmente lamentable, decepcionante, viñéronnos a vender unha moto" e engadiu que "me gustaría vivir na realidade que vive o conselleiro de Sanidade" pero "no Grove non temos Atención Primaria porque non existe".
Igualmente o alcalde de Caldas de Reis, Juan Manuel Rei, concluíu que "o que corresponde é pedir unha reunión con alguén que teña autoridade e capacidade" en referencia ao presidente da Xunta, Alfonso Rueda, ante unha situación na sanidade pública que "non é sustentable" e que no seu concello "correspóndese máis cun servizo de corte africano que non moderno e actual".
Nesta mesma liña, o rexedor do municipio de Poio, Luciano Sobral agradeceu a reunión, pero lamentou que "o conselleiro parte dunha análise equivocada porque hai que recoñecer que temos un problema" para "a partir de aí porlle remedio e aí é onde debemos estar todos". "Pero cando se maquilla ou se nega o problema partimos dunha situación errónea", resolveu.
