Piden 55 anos de cárcere para un acusado de malos tratos e agresión sexual continuados, ameazas e lesións
Tamén que lle impoña a prohibición de achegarse ou comunicarse coa vítima durante 34 anos
Por Europa Press / Redacción | VIGO | 25/02/2023 | Actualizada ás 13:39
A Fiscalía solicita penas que suman 55 anos de cárcere para un home acusado de varios delitos de violencia de xénero, entre eles malos tratos e agresión sexual continuados, e que será xulgado este martes na sección cuarta da Audiencia Provincial de Pontevedra.
Atendendo á gravidade dos feitos e para preservar a indemnidad da vítima, o Ministerio Público solicitou que a vista se celebre a porta pechada. Así mesmo, pediu que a muller poida declarar tras un biombo e que teña a posibilidade de ser acompañada por unha psicóloga.
A Fiscalía considera ao acusado autor dun delito de malos tratos habituais sobre a muller, un delito de detención ilegal, un delito continuado de agresión sexual con penetración, un delito de lesións con deformidade, varios delitos máis de lesións, un delito continuado de ameazas e un delito continuado de coaccións.
Así, pide que sexa condenado a penas que suman 55 anos de cárcere, e que lle impoña a prohibición de achegarse ou comunicarse coa vítima durante 34 anos. Con respecto á responsabilidade civil, o Ministerio Público pide que o acusado indemnice á vítima en 60.000 euros polas secuelas, lesións e dano moral. Tamén reclama que indemnice ao Sergas pola asistencia médica prestada á muller.
