Volven as temperaturas xélidas, con Calvos de Randín marcando a mínima con -9,1º

A localidade ourensá Calvos de Randín rexistrou esta madrugada -9,1 graos centígrados sobre as 03,00 horas, situándose como a temperatura máis baixa deste martes en Galicia. Segundo datos de Meteogalicia, a estación de Baltar (Ourense) foi a segunda na Comunidade que marcou unha temperatura máis baixa, con -8,7 graos, seguida de Viana do Bolo (-7,9º), Xinzo (-7,4º) e Verín-Vilela (-7,2º), todas na provincia de Ourense.

Pola súa banda, Vigo foi onte luns o municipio galego que rexistrou os valores máis altos, con 15,2 graos, do mesmo xeito que Salceda de Caselas e seguido de Lourizán (+15,1º), Pontevedra-Campolongo (+14,9º) e A Granxa (14,9º), todos tamén na mesma provincia e pasadas as 16,00 horas.

Para este martes, Meteogalicia prevé que continúe a chegada de aire frío á Península, o que provocará unha caída das mínimas, aínda que as máximas manteranse estables. O mércores, a masa de aire frío comezará a retirarse, o que permitirá un estancamento das temperaturas mínimas e unha subida das máximas.

FRÍO E NEVE

Todas as autonomías excepto Estremadura e Canarias terán este martes avisos por risco (amarelo), risco importante (laranxa) ou mesmo extremo (vermello) por frío, nevadas, ondada ou ventos fortes, segundo avisou a Axencia Estatal de Meteoroloxía (AEMET).