Por E.P. | Galicia | 13/03/2023 | Actualizada ás 16:25
A Xunta incorporou 722 elementos ao inventario de zonas húmidas de Galicia, un rexistro autonómico no que se inclúe información sobre o número, extensión, valores e estado de conservación dos espazos deste tipo.
Con este inventario perséguese estandarizar e organizar toda a información dispoñible relativa ás zonas húmidas, tanto xeral como territorializada, co propósito de dispor dunha base de referencia para os cambios futuros e proporcionar unha ferramenta para a planificación e xestión do patrimonio natural, apunta a Xunta.
Neste sentido, o Diario Oficial de Galicia publica este luns a resolución da Consellería de Medio Ambiente pola que se inclúen no inventario 400 novas zonas húmidas no conxunto da Comunidade, espazos que suman máis de 43.000 hectáreas de superficie e algunhas das cales abarcan varios elementos que, pola súa singularidade, merecen ser incluídos neste catálogo.
Destaca especialmente a provincia da Coruña, que alberga 116 das 400 zonas húmidas (e un total de 215 elementos) que se acaban de incorporar ao rexistro galego e que, de feito, caracterízase por ser especialmente rica neste tipo de ecosistemas. Completan a listaxe os 101 humidais da provincia de Lugo (196 elementos); os 108 humidais de Ourense (con 149), e os 101 pertencentes a Pontevedra (162 elementos).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.