Reunión de Anpas Galegas con PP, BNG e PSdeG para falar da "necesidade" dun plan educativo propio para o rural

Representantes da Federación Anpas Galegas reuníronse co tres partidos representados no Parlamento galego --PP, BNG e PSdeG-- para abordar a "necesidade" dun plan educativo específico para o rural galego e pedir un "cambio de rumbo" nas políticas da Xunta respecto diso.

Segundo expoñen os representantes dos pais e as nais nun comunicado, xa falaron con todos os grupos políticos. "E non podemos dicir que o nivel de recepción das nosas propostas fose o mesmo nos diferentes casos. Hai quen pensa que todo está no mellor dos mundos e quen sabe que hai moito que arranxar. Nós estamos no segundo caso e dicímolo", constatan.

E é que Anpas Galegas, tras realizar enquisas, asembleas de entidades federadas e incorporar suxestións de expertos, considera que teñen "argumentos suficientes" para reclamar este cambio de políticas e unha maior participación dos concellos no ámbito educativo, ante a proximidade das eleccións municipais de maio.

Na súa carteira de reivindicacións, está a organización de actividades complementarias para o rural; a defensa e promoción do galego desde os concellos; a convocatoria dos consellos escolares municipais, unha "obrigación legal que moitos incumpren impunemente"; o mantemento das instalacións; e as implicacións nas actividades de conciliación, entre outras.

Unha nena á súa chegada á escola | Fonte: Isabel Infantes - Europa Press