O goberno local de Santiago apunta ao "alto nivel de funcionalidade" do servizo de lixo con críticas da oposición
Luz verde ao estudo económico e o prego de condicións para o transporte urbano da capital galega
Por E.P. | Santiago de Compostela | 30/03/2023 | Actualizada ás 17:59
A concelleira de Políticas Sociais, Saúde, Medio Ambiente e Parques e Xardíns de Santiago, Mila Castro, deu conta do alto nivel de funcionalidade" do servizo de lixo, asinado en maio de 2022 cunha vixencia de dez anos, entre críticas de todos os grupos da oposición.
Castro apuntou a que o servizo "mellorará cando se teñan todos os camións", que "aínda non se puideron despregar na súa totalidade por circunstancias externas". Así, puntualizou que "se espera que cheguen en abril e maio". Nesta liña, resaltou que para a hostalaría e o comercio "seguiranse adoptando as medidas necesarias" e insistiu en que "o cambio empeza a ser notorio".
CRÍTICAS DA OPOSICIÓN
A portavoz de BNG, Goretti Sanmartín, indicou que "non coinciden no modelo" escollido para este contrato porque "non aposta pola reciclaxe de maneira real". Así, pediu que "se tomen as medidas necesarias sobre o incumprimento dos pregos".
O concelleiro de Compostela Aberta, Xan Duro, sobresaíu que é necesario que "se entenda e se dialogue con veciños, traballadores e coa empresa", posto que, tras un ano de funcionamento, "a insatisfacción é xeneralizada".
Nesta liña, o concelleiro do PP, José Antonio Constenla, sinalou que a percepción do servizo que ten o Goberno municipal "non coincide coa de ninguén máis" e criticou o funcionamento da recollida intelixente porque "é dar un paseo pola cidade para ver os colectores sobordar".
Así mesmo, o concelleiro non adscrito, Javier Fernández, insistiu en que este contrato "non funciona ben" e que a Castro "non lle importan que se incumpra o prego", xa que "é cómplice da empresa".
CONTRATO TRANSPORTE URBANO
Noutra orde de asuntos, a Oficina Nacional de Avaliación deu luz verde ao estudo económico e o prego de condicións para o transporte urbano. Segundo trasladou o Concello nun comunicado, co novo contrato levará a cabo a renovación completa de toda a frota, un total de 58 autobuses eléctricos ou de baixas emisións.
