Investigadores da USC conclúen que o comportamento humano altérase ao chegar a grupos de 180 e 5.000 persoas
Por E.P. | VIGO | 04/04/2023 | Actualizada ás 17:46
Os investigadores da Universidade de Santiago, Martín Saavedra, Jorge Mira e Alberto P. Muñuzuri, xunto con Luís F. Seoane do CSIC, fixeron un estudo sobre as dinámicas sociais e o comportamento colectivo humano e concluíron que este se ve alterado de forma notoria cando os grupos chegan a 180 e 5.000 persoas.
O traballo, co título 'A spectrum of complexity uncovers Dunbar's number and other leaps in social structure', foi publicado en Chaos, Solitons & Fractals, e determina escalas (números de persoas) nas que a complexidade dun grupo social vese incrementada de maneira especialmente intensa.
"O aumento da complexidade ás veces experimenta saltos bruscos. Existen certos tamaños por baixo dos cales nosas relacións son simples; pero unha vez que superamos ese límite, a estrutura social vólvese máis complexa de forma moi rápida", sinalaron os investigadores da Facultade de Física da USC, Martín Saavedra, Jorge Mira e Alberto P. Muñuzuri; e Luís F. Seoane do CSIC.
Así, os científicos estudaron os procesos sociolingüísticos acontecidos en Galicia ao longo dos últimos cen anos. Neste tempo, o galego tendeu a ser substituído polo castelán, a pesar de que as dúas son linguas romances con alta intelixibilidade mutua, o que habilita o bilingüismo e podería soster a coexistencia dos dous idiomas a longo prazo.
Estas dinámicas despregáronse ao mesmo tempo, a diferentes velocidades, en núcleos rurais e en grandes cidades. Galicia contén a metade das 60.000 entidades singulares de poboación que hai no conxunto do Estado, das cales 27.000 son núcleos con menos de cen habitantes, feito que permitiu aos investigadores contar con grupos sociais de diversa complexidade á hora de abordar a evolución deste fenómeno.
Os investigadores ordenaron estas velocidades de cambio segundo a fracción de poboación urbana en cada rexión. Con isto descubriron que hai "tamaños" nos cales a complexidade da rede social pega un "acelerón". As escalas singulares localízanse ao redor de 180 e 5.000 habitantes, ambos os números moi significativos no estudo da complexidade de grupos humanos.
O número 180 é o máis destacado pola súa proximidade ao chamado número de Dunbar, antropólogo que teorizou sobre a cantidade de persoas que poden relacionarse plenamente nun grupo social. A outra escala singular detectada, 5.000 persoas, entronca co que sucede en varios ordenamentos territoriais xa que a lexislación española marca cambios en concellos con máis de 5.000 habitantes, sendo este tamén un dos límites nos que se producen modificacións na composición dos plenos municipais, entre outros. Os autores apuntaron, como curiosidade, que esta cantidade coincide case con 5.040, o número que Platón identificaba como o tamaño ideal dos seus polis utópica.
