O PSdeG pide á Xunta elaborar un protocolo de baleirado de encoros que reduza o impacto sobre bancos marisqueiros

O portavoz de Marisqueo do Grupo Socialista, Julio Torrado, presentou unha serie de iniciativas no Parlamento de Galicia para pedirlle á Xunta que elabore un protocolo de baleirado de encoros para "reducir o seu impacto" sobre os bancos marisqueiros. Así, segundo explican nun comunicado, o responsable socialista propón desaugadoiros progresivos, en preamar e avisando con tempo a municipios e confrarías, "que axudarían a paliar o problema".

Torrado sinala que os problemas de aumento e diminución brusca da salinidade que provoca a entrada repentina e masiva de auga doce procedente destes baleirados masivos está, xunto a outras causas, "detrás dos episodios de enorme mortalidade de marisco". Afecta especialmente, indican, á ameixa e ao berberecho que son referencia da produción das rías de Arousa ou de Muros - Noia.

"O control dos desaugadoiros dos encoros resulta claramente mellorable por parte das empresas que os xestionan, que son de titularidade privada pero operan a través de concesións de xestión concedidas pola Xunta. O sector marisqueiro avisou, en concreto nas dúas rías mencionadas, de episodios de baleirado brusco, sen control e sen aviso ou con advertencias a feitos consumados a algunhas entidades de emerxencia da contorna", denuncian.

Apunta que "é posible regular e controlar estes desaugadoiros de maneira máis axustada para non prexudicar ao sector marisqueiro facéndoo de forma escalada e coincidindo coa pleamar para limitar na medida do posible a variación da salinidade".

Por último, sinala a importancia de avisar previamente ás confrarías e aos municipios afectados, xa que a baixada de fortes masas de auga en momentos de seca, con xente traballando no mar "provocou situacións de descontrol que pode afectar á seguridade dos traballadores".

Julio Torrado