Animalistas presentan unha denuncia pola presenza de menores de 12 anos nunha tourada en Padrón
Consideran de "extrema gravidade" que estivera o alcalde no evento no que non se advertiu da prohibición de acceso a menores de 12 anos.
Por Europa Press / Redacción | SANTIAGO DE COMPOSTELA | 11/04/2023 | Actualizada ás 12:39
A plataforma Galicia, Mellor Sen Touradas anunciou a presentación dunha denuncia administrativa contra os organizadores dun evento taurino celebrado en Padrón pola presenza de menores de 12 anos no recinto.
Nun comunicado emitido este martes, o colectivo antitaurino indicou que a normativa autonómica prohibe a asistencia de menores de 12 anos a este tipo de espectáculos, o que está considerado unha infracción grave.
Ademais, Galicia, Mellor Sen Touradas tamén considera que a organización deste evento infrinxiu a normativa por non incluír na publicidade a "advertencia explícita de condicións de admisión particulares, como é o non acceso de menores de 12 anos".
Apunta que as posibles sancións por estas cuestións poderían superar os 30.000 euros, ademais de implicar a suspensión ou prohibición de actividade por un período dun ano. Así, cualifica de "extrema gravidade" a presenza de menores nun recinto no que, segundo inciden, se atopase o alcalde de Padrón, Antonio Fernández Angueira, quen "en ningún momento advertiu" de algo que é "evidente nas imaxes" difundidas a través das redes sociais do concello.
