O PSOE de Ourense presenta un programa para "revivir" unha cidade "convertida en meme"
A actual secretaria local e portavoz municipal do PSOE, Natalia González, cualificou de "intenso, ambicioso e renovado" para gobernar "o Ourense do futuro"
Por E.P. | SANTIAGO DE COMPOSTELA | 12/04/2023 | Actualizada ás 16:15
O Partido Socialista de Ourense presentou este mércores as principais liñas do seu programa electoral para os comicios do próximo 28 de maio, unhas propostas coas que busca "revivir" unha cidade "convertida en meme".
Así o destacou este martes o candidato socialista nunha rolda de prensa na que debullaron algúns de detalles deste programa dirixido pola comisión executiva municipal e ideado e redactado despois de incorporar, segundo explicaron, achegas da militancia e de diferentes colectivos e sensibilidades sociais.
Un traballo que a actual secretaria local e portavoz municipal do PSOE, Natalia González, cualificou de "intenso, ambicioso e renovado" para gobernar "o Ourense do futuro". Pola súa banda, Francisco Rodríguez destacou que o resultado é "realista, responsable e moi ambicioso" tendo en conta "o potencial desaproveitado" da cidade "co último goberno".
Así, dixo que con este programa comprométense coa cidadanía, expondo quen son, que queren e onde pretenden chegar coa súa folla de ruta para o próximos catro anos. O documento estará dispoñible nos próximos días a través das redes sociais da formación.
Na súa intervención, Rodríguez referiuse ao Partido Popular para incidir en que "foron os que elixiron a este alcalde". "Gobernaron con el e mantivérono no cargo", dixo o socialista, que emprazou aos populares a "un pacto de claridade e de cidade".
Deste xeito, considerou necesario "revivir" unha cidade que se converteu "nun meme" e cuxa crónica nacional "foi degradante". "A educación e a tolerancia foron atropelados polo insulto, a descualificación e a indigencia intelectual", sostivo Francisco Rodríguez.
No acto, o aspirante socialista á Alcaldía abordou outros asuntos, como a necesidade de "unha urxente adxudicación" de servizos que están en precario como a auga ou o transporte urbano. Ademais, propuxo a creación dunha Empresa Municipal de Vivenda e a recuperación de zonas degradadas, como medidas estrelas do seu programa electoral.
"Queremos promover un marco de colaboración cos operadores públicos e privados para desenvolver unha política de vivenda protexida e a creación dunha Empresa Municipal de Vivenda", avanzou Francisco Rodríguez, que sostivo que o centro histórico ofrece moitas posibilidades para a súa rexeneración, servindo á vez para vivendas para xente nova, pero tamén outros barrios como Mariñamansa ou A Ponche.
Ademais, destacou a intención de elaborar un novo plan de integración urbana de alta velocidade "para que a Intermodal sexa motivo de orgullo para todos os ourensáns" e insistiu na necesidade de recuperar o proxecto de Norman Foster.
PROPOSTAS NO ÁMBITO CULTURAL
Entre as iniciativas do programa tamén algunhas de rápida aplicación a curto prazo e outras que abarcan un horizonte amplo como que Ourense chegue a ser Capital Europea da Cultura 2031 co plan "Auria2031: cultura e auga".
No mesmo ámbito, no cultural, apostou por un proxecto de recuperación de espazos degradados a través de arte urbana. O programa dos socialistas tamén inclúe medidas como a recuperación da Universidade Popular de Ourense e a creación dun bulevar termal para que o catro quilómetros de marxe dereita do río Miño conten con zonas de árbores, para lecer e goce, carril bici e aparcadoiros.
A axenda verde-2030, un plan de mobilidade sustentable ou a apertura ao público da praza de abastos son outras das medidas recollidas, nas que profundarán nas próximas semanas. "Estamos preparados, temos candidato, candidatura e programa para gobernar esta cidade", garantiu a secretaria xeral, Natalia González.
