Proposta do BNG para que Correos poida ser unha entidade pública financeira, de seguros e unha operadora telefónica

O BNG rexistrou unha proposición non de lei no Congreso para, entre outras medidas, declarar a Correos como empresas de interese social e utilidade pública para que poida actuar como entidade pública financeira e de seguros e tamén como un operador telefónico.

E é que, a formación galega considera que coa dotación de medios adecuada Correos pode ser un instrumento que facilite servizos postais e de paquetería, pero tamén "bancarios e de seguros e mesmo de telefonía" ou outros que doutra forma, di o BNG, non serán garantidos ao conxunto da poboación.

En concreto, o Bloque Nacionalista cre que é nos servizos bancarios onde Correos "debe recuperar o papel protagonista que noutro tempo xogou", para dar unha resposta completa ás necesidades da poboación. Sobre todo, sinala o BNG, tendo en conta que na banca privada "hase desentendido dunha gran parte da poboación, negando unha atención presencial próxima e en horario suficiente na maioría de núcleos". Para levar a cabo ese novo operador de telefonía, o BNG expón aproveitar a sinerxía de Correos Telecom.

Noutro punto da proposición non de lei, os nacionalistas galegos expoñen fixar unha achega económica por parte do Ministerio de Facenda á empresa, co obxectivo de garantir a sustentabilidade económica da entidade pública e facer fronte aos retos de servizos que debe cumprir na sociedade actual, tendo en conta criterios de servizo público.

No que respecto ao resto de puntos da proposta, o BNG insta o Goberno a revisar os prezos contemplados no Servizo Postal Universal (SPU), para dar á cidadanía cabida a necesidades financeiras, de paquetería ou de comunicación. Ademais, exponse a apertura en horario de tarde en todas as oficinas da empresa, para así evitar as dificultades de acceso.

O deputado do BNG no Congreso, Néstor Rego. BNG