O Sergas estende a toda a poboación de entre 50 e 59 anos da área de Pontevedra un cribado de hepatite C

A área sanitaria de Pontevedra e O Salnés implantou un cribado de hepatite C que abarca centros hospitalarios e de Atención Primaria que, tras iniciarse o pasado 9 de maio, esténdese a partir desta semana a todas as persoas de entre 50 e 59 anos. Así, a todas as persoas deste grupo de poboación ás que se lles efectúe unha extracción de sangue xestionaráselles sistematicamente unha proba de detección desta enfermidade.

O cribado céntrase neste grupo porque, segundo as cifras que manexa a Consellería de Sanidade, aglutina "máis da metade dos galegos con hepatites C aínda non diagnosticados". Con todo, sinalou que este cribado avanzará nos próximos anos na idade dos participantes, co obxectivo de cubrir a todas as persoas de entre 40 e 69 anos.

O resto de poboación, á marxe da súa idade, tamén poderá solicitar unha proba de detección desta enfermidade sen ter que dar ningunha explicación. No caso de atoparse algún positivo, a persoa seráavisada para recibir un tratamento oral, de 8 a 12 semanas de duración, que non necesita de posteriores visitas ao médico. A hepatite C é unha enfermidade que pode causar cirrosis e mesmo cancro, pero, "cun tratamento sinxelo, pode curarse na práctica totalidade de casos".

Test de hepatite B | Fonte: Congreso internacional Prevencionar.