A Xunta destina 250.000 euros para a adaptación de pacientes con drogodependencia estabilizados

A Xunta convocou axudas, de 253.000 euros, para a incorporación social en vivendas para pacientes drogodependentes en tratamento e seguimento en unidades asistenciais especializadas que estean "estabilizados e que necesiten apoio para a súa adaptación á vida cotiá". Segundo trasladou o Goberno galego nunha nota de prensa, o Diario Oficial de Galicia (DOG), publicou este mércores a orde, destinada ás entidades privadas sen ánimo de lucro que realicen programas de incorporación social e "faciliten a adaptación destas persoas con dificultades á vida cotiá".

Así, os usuarios serán pacientes en tratamento e seguimento nas unidades de atención a drogodependencias que requiran dun programa de incorporación social con apoio residencial. O acceso a este recurso será "voluntario e ofertarase de forma prioritaria cando non exista un apoio sociofamiliar adecuado ou concorran situacións de vulnerabilidade". A través desta orde, a Xunta financiará catro programas de inserción social en vivendas e achegará unha cantidade máxima de 63.326 euros por programa, o que supón un aumento de máis de 8.200 euros con respecto ao ano pasado. As entidades solicitantes teñen un prazo dun mes para presentar as solicitudes. O procedemento será tramitado en réxime de concorrencia competitiva, e adxudicaranse as axudas aos programas que obteñan as puntuacións máis altas.

CREACIÓN DE VIVENDA PÚBLICA EN LUGO

O Goberno galego licitou por 4,4 millóns de euros a redacción dos proxectos básico e de execución e de dirección de obra para a construción de 24 vivendas de promoción pública na rúa Angelo Collocci, en Lugo. Segundo trasladou a Xunta nunha nota de prensa, a Plataforma de Contratos Públicos de Galicia recolleu a licitación, por importe de máis de 196.000 euros cuxo prazo de presentación de ofertas acaba o próximo 14 de agosto.

En concreto, o obxectivo é a construción dun edificio na parcela UA-N7, unha das seis cedidas polo Concello de Lugo onde a Xunta prevé un total de 137 vivendas de promoción pública, cunha estimación de 20,9 millóns de euros de investimento.