Por E.P. | SANTIAGO DE COMPOSTELA | 27/05/2023 | Actualizada ás 13:44
As familias que queiran optar este verán a unha praza nas residencias de tempo libre de Panxón (Nigrán) ou do Carballiño teñen ata o martes da próxima semana, día 30 de maio, para presentar as súas solicitudes.
Segundo detallou a Consellería de Política Social e Xuventude, cursarase unha única solicitude por unidade familiar, na cal se indicará a orde de preferencia no goce das estancias e en que residencia. Estas deberán dirixirse ás xefaturas territoriais de Ourense ou Vigo, en función do centro residencial que se elixa. Ademais, as peticións poderán realizarse a través da sede electrónica da Xunta.
Asímismo, o departamento que dirixe Fabiola García explicou nunha nota de prensa que este ano haberá 2.760, distribuídas da seguinte maneira: 1.320 prazas na residencia de tempo libre de Panxón, en Nigrán; e 1.440 na residencia de tempo libre do Carballiño.
Outra das novidades que hai nesta convocatoria é a ampliación das quendas ata finais de setembro, para aquelas familias con fillos maiores ou sen fillos que tamén queiran acudir a estas residencias.
O prezo por persoa e día é de 37 euros en pensión completa, ao que se engaden descontos por nenos (dun 50%) e familias galegas de especial consideración como numerosas ou monoparentais, acolledoras ou vítimas de violencia machista (dun 30%).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.