Pontón di que en Ourense se repetirá o pacto de Jácome e Baltar de 2019 e evita dar outras fórmulas

Chama ao PSOE a entrar no goberno tras descartar os nacionalistas facelo na lexislatura de Bugallo e Martiño Noriega. "A cidade merece estar por encima de intereses partidistas", di.

Por Europa Press / Redacción | SANTIAGO DE COMPOSTELA | 03/06/2023 | Actualizada ás 16:03

Comparte esta noticia

A portavoz nacional do BNG, Ana Pontón, instou ao PP a clarificar "que quere facer" en Ourense, tanto no goberno da deputación como no do concello da capital, pois cre que os populares van repetir o pacto con Democracia Ourensana polo que en 2019 repartíronse a Presidencia da institución provincial para o popular Manuel Baltar e a Alcaldía para Gonzalo Pérez Jácome.

"Mentres non teñamos claro o que vai facer o PP, o resto son titulares para manternos entretidas e entretidos", aseverou Pontón en resposta ás preguntas dos medios durante a súa intervención no Consello Nacional do BNG celebrado na mañá deste sábado nun hotel de Teo.

"Todo me dá a que van repetir o de fai catro anos", engadiu a líder nacionalista, que basea a súa opinión na lectura "entre liñas" do que trasladan os populares, da que interpreta que queren volver repartirse concello e deputación co partido de Jácome.

"Parece que esa é a xogada", incidiu a responsable do Bloque, que conta con catro edís no concello e tres na deputación, institucións nas que, en días anteriores ao Consello deste sábado, os nacionalistas xa trasladaran que rexeitan facilitar gobernos a Jácome ou Baltar.

Así as cousas, Pontón sitúa ao PP no centro sobre a gobernabilidade en Ourense e mostrou a súa "sorpresa" polo "silencio absoluto" que, di, gardan os responsables do PP. "Non se se Rueda ten algo que dicir ou llo marcan desde fóra. En todo caso, ata agora hai un silencio absoluto e me soprende", apostilou.

ALIANZAS E SANTIAGO

Así pois, Pontón remarcou que o Bloque ten "as cousas moi claras" e "non vai permitir" que o PP goberne nos municipios "onde non teña maioría" para facelo, aínda que trasladou que a decisión de entrar ou non en gobernos será decidido nas asembleas locais e a dirección nacional non vai impor "directrices".

No caso de Santiago, onde a nacionalista Goretti Sanmartín parece ter blindados os apoios de PSOE e Compostela Aberta para converterse na nova alcaldesa da capital galega, Pontón apelou a que as formacións políticas antepoñan "os intereses" da cidade aos do partido.

"A cidade ten que estar por diante de calquera interese partidista", sinalou en resposta a unha pregunta sobre a distancia marcada polo PSOE á oferta feita polo BNG para que os socialistas, que contan co mesmo número de edís que o nacionalistas pero obtiveron case 1.000 votos menos, entren a formar parte dun goberno de coalición. 

Así, Pontón fixo un chamamento a PSOE e CA para que se "somen" no futuro goberno de Santiago, unha cidade que "merece un tempo novo". Con todo, o Bloque rexeitou en 2019 e 2015 entrar nos gobernos de Bugallo e Martiño Noriega a pesar das chamadas reiteradas do ex alcaldes a facelo.

Foto do BNG no Consello Nacional celebrado o 3 de xuño. BNG
Foto do BNG no Consello Nacional celebrado o 3 de xuño. BNG | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 3 comentarios

2 Barbaña

A solución en Ourense pasa por amortizar a "Dinastía Baltar", (Baltar II e Jácome I). Rueda debe deixar esto explicitamente claro!!!. Sen esto coido que nada é crible.

1 Gamela

De verdade ides poñer no mesmo saco a Baltar II e Jácome I ? Alucinante ! Qué terá que ver un medio pailán arribista froito do resentimento contra o bipartidismo reinante, coa Mafia de Ourense de toda a vida ? Será que así non ides dar botado a quen vos dá de comer ? Esto empeza a cheirar a podre... Veremos ata onde chegamos nesta nova estratexia de non lixarse nunca ?

1 Gamela

Así que ten unha corazonada a Pontón... Vaia cuca que é, así non mancha as mans movendo ficha e falando dunha solución con Jácome ! Esto que é ? Deixar facer...? Para eso votaron BNG ? https://resultados.locales2023.es/r... O que non é de recibo é non intentar siquera mover os marcos na Deputación de Ourense ! Pasaron 8 anos abanicando á Marquesa de Toralla pero falar con Jácome nin de lonxe ? Anita así non vas chegar á Presidencia da Xunta na vida... claro que igual é o que quere seguir etermanente laíandose das verrugas do PP !