Sanidade di que ser médico rural é "moi gratificante" pero aposta por incentivalo máis
Por E.P. | SANTIAGO DE COMPOSTELA | 03/06/2023 | Actualizada ás 19:42
O conselleiro de Sanidade, Julio García Comesaña, enxalzou a figura do médico rural e recoñeceu que, aínda que é unha responsabilidade "moi gratificante", necesita de ser "incentivado" desde as administracións.
O titular da Consellería de Sanidade participou este sábado en Lugo na entrega do II Bolsa de Medicina Rural da Asociación de Médicos Galegos e a Sociedade Española de Médicos Xerais e de Familia. Alí, segundo recolle un comunicado, defendeu os investimentos en materia de equipamento de diagnóstico e "o fomento de incentivos" para postos de "difícil cobertura" que realiza o Goberno galego.
"O exercicio profesional no rural é moi gratificante, pero tamén ten algúns inconvenientes, e iso hai que incentivalo", resaltou o conselleiro, que insistiu en que debe modificarse o Estatuto Marco do persoal sanitario para introducir "vantaxes específicas para as prazas de difícil cobertura na lexislación nacional".
"Somos conscientes do esforzo que fan os nosos profesionais e queremos ofrecerlles as mellores condicións para que poidan desenvolver o seu traballo no campo do equipamento e no das condicións laborais", aseverou Comesaña.
