Persoal de concellos inseridos no Pacto das alcaldías polo clima recibe formación para as próximas fases

A Xunta asesora ao persoal municipal dos concellos adheridos ao Pacto das alcaldías polo clima e a enerxía sobre as seguintes fases a desenvolver no marco desta iniciativa a través dun webinario que foi inaugurado este martes pola conselleira de Medio Ambiente, Territorio e Vivenda, Ángeles Vázquez.

Esta xornada formativa en liña, organizada no marco dos actos da Semana por unha Galicia sustentable que promove a Xunta con motivo do Día mundial do medio ambiente, ten como obxectivo orientar aos concellos de cara á actualización dos Plans de acción polo clima e a enerxía sustentable.

En concreto, segundo trasladou a Consellería, os seguintes pasos a dar serían presentar os dous primeiros informes de seguimento, completar os contidos relativos á adaptación ao cambio climático e introducir a loita contra a pobreza enerxética.

Nesa liña, a sesión estará dividida en dúas accións formativas. Por unha banda, analizaranse os avances levados a cabo na loita contra o cambio climático por parte dos concellos galegos e, doutra banda, abordarase a avaliación local da vulnerabilidade enerxética.

Ademais de adaptar o contido do webinario ás características dos concellos da Comunidade, ao final de cada sesión abrirase un espazo de debate e resolución de dúbidas dos asistentes. Galicia conta con 285 concellos adheridos a esta iniciativa, dos que o 87% xa deseñaron un Plan de Acción polo Clima e a Enerxía Sustentable.

Os bosques de Montirón (Guido Álvarez Parga)