Darío Villanueva, recoñecido polo Consello Social da USC, defende á institución como produtora cultural
Por E.P. | SANTIAGO DE COMPOSTELA | 09/06/2023 | Actualizada ás 17:20
O ex reitor da USC e antigo presidente da Real Academia da Lingua (RAE), Darío Villanueva, recibiu este venres o Recoñecemento á súa Traxectoria Profesional que outorga o Consello Social da USC e onde defendeu á universidade como "produtora e divulgadora" de cultura.
O acto celebrouse no Salón Nobre do Pazo de Fonseca, presidido polo reitor da Universidade de Santiago, Antonio López, e a presidenta do Consello Social, Cecilia Sierra, e contou coa presenza do secretario xeral de Universidades, José Alberto Díez de Castro, así como con outros representantes da vida política e cultural de Santiago.
Na súa presentación, o reitor lembrou que a entrega deste recoñecemento vai na liña do que busca o Consello, "conectar coa sociedade universitaria e pór en valor o servizo que prestan os graduados". Todos os intervenientes encomiaron a prolífica e extensa carreira de Villanueva tanto dentro como fóra dos muros universitarios.
O que tamén foi reitor da USC fixo un repaso pola súa andaina na universidade, primeiro como estudante, logo como profesor --durante case 50 anos-- e, por último como reitor. A transición universitaria, o quinto centenario da institución ou a negociación do Plan Bolonia foron algúns dos capítulos nos que se detivo Villanueva.
Tamén rememorou algunhas anécdotas --como cando instaurou o costume de visitar na súa casa a catedráticos que, por motivos de saúde xa non facían vida pública--. Ao fío disto --lembrando o cántico estudantil 'Darío, de ti non me fío'--, defendeu a participación estudantil na toma de decisións da universidade e reivindicou á institución como fonte "produtora e divulgadora" de cultura.
