Podemos ou non podemos bañarnos despois de comer? Un estudo de USC e UVigo responde á gran pregunta do verán
Rexeita tamén a idea de que, tras o afogamento, a vítima debe colocarse boca abaixo "para baleirar a auga dos pulmóns".
Por Europa Press / Redacción | SANTIAGO DE COMPOSTELA | 04/07/2023 | Actualizada ás 19:24
Un estudo da USC e da UVigo reúne e rebate algúns dos principais mitos asociados aos incidentes acuáticos. Entre eles, se as persoas piden axuda e moven os brazos antes de afogarse; se é necesario esperar dúas horas para bañarse despois de comer; se despois dun afogamento hai que colocar á vítima boca abaixo para baleirar os seus pulmóns de auga; ou se os ouriños é un bo remedio fronte á picadura dunha medusa.
Unha persoa que pide axuda move os brazos antes de afogarse? Este estudo responde: "Unha persoa que se afoga faino en silencio, non grita e non pide axuda, trata de sacar a cabeza e concentra todos os seus esforzos en respirar".
Do mesmo xeito, os autores deste estudo rebaten tamén a idea de que, tras o afogamento, a vítima debe colocarse boca abaixo "para baleirar a auga dos pulmóns", unhas manobras que "ademais de ser inútiles, supoñen unha perda de tempo esencial", polo que recomendan aplicar canto antes o protocolo de reanimación cardiobascular básica.
No referido a a seguridade dos bañistas, o estudo indica sobre 'mitos' como o do corte de dixestión que "non hai contraindicacións para bañarse" tras consumir alimentos. Así, argumenta que esta idea pode confundirse coa "hidrocución ou shock termodiferencial", que pode ocorrer cando unha persoa se mergulla "bruscamente" e existe "unha notable diferenza entre a temperatura corporal e a da auga".
MANGUITOS OU FLOTADORES
Así mesmo, tamén rexeita que manguitos ou flotadores preveñan o afogamento, xa que "non garanten que a cabeza e as vías respiratorias queden fose da auga en todo momento" e poden xerar "unha falsa sensación de seguridade" nos menores e nos seus coidadores.
Ademais, outra falsa crenza, segundo recolle este estudo, é a de que "para aguantar máis" durante un mergullo en apnea, debe "inspirarse profundamente varias veces", algo que "está contraindicado porque pode ter uns efectos fisiológicos que alteran os centros receptores respiratorios e provocar a perda de consciencia debaixo da auga".
Tamén no ámbito da seguridade, os expertos rexeitan a utilidade dos ouriños e doutros "remedios caseiros" fronte a picadura de medusas, xa que estes "non alivian as molestias e mesmo poderían aumentar a descarga de veleno". Fronte a isto, recomendan limpar os restos da medusa e lavar a zona con auga do mar", así como solicitar asistencia sanitaria "ante calquera dificultade respiratoria, mareo ou malestar".
