Comezan esta semana os traballos de limpeza na autovía AG-64, en Narón, e na estrada OU-209, en Leiro

A Xunta comezará esta semana traballos de limpeza nas marxes da autovía Ferrol-Vilalba, a AG-64, ao seu paso por Narón, e na estrada OU-209, no concello ourensán de Leiro.

Segundo comunicou a Consellería de Infraestruturas e Mobilidade, na provincia de Ourense, ademais de iniciarse as limpezas na OU-209 en Leiro, proseguirán os traballos que se están levando a cabo na estrada autonómica OU-801, que comunica os municipios de Padrenda e Ribadavia.

Mentres, na provincia de Pontevedra seguirase coas intervencións en execución nas marxes da autovía AG-51, no municipio de Salvaterra de Miño; na VG-4.6, que comunica os municipios de Cangas e Bueu; e na vía de altas prestacións do Morrazo (CG-4.1), Moaña-Cangas.

Estas tarefas forman parte do novo contrato da Xunta coa empresa pública Seaga para o control da biomasa das marxes das estradas autonómicas e mellora da seguridade viaria, que supón un investimento de case tres millóns de euros para os dous próximos anos.

Os obxectivos dos traballos son a roza de vexetación na zona de dominio público das estradas autonómicas, así como o acondicionamento de zonas verdes en senllas peonís e rotondas, ou a reposición ou reparación de elementos de valado perimetral das estradas.

O Goberno galego subliñou que este programa ten o obxectivo de previr o risco de incendios e contribuír ao reforzo da seguridade viaria mediante o aumento da visibilidade e as accións para facilitar o tránsito de peóns e ciclistas.

Roza de estradas autonómicas | Fonte: XUNTA