Así está o panorama: O PP reina no 95,2 % dos concellos galegos, o BNG perde o feudo de Allariz e Sumar é terceira forza en Ferrol
Os populares superan o 50 % de apoios en máis da metade do total de municipios galegos, polo que pasan de dez a 13 escanos no Congreso.
Por Europa Press / Redacción | SANTIAGO | 24/07/2023 | Actualizada ás 19:19
O mapa electoral de Galicia tras a cita coas urnas deste domingo reflicte que o PPdeG logrou situarse como primeira forza nun total de 298 concellos (o 95,2 % dos 313), moi por encima dos 229 nos que foi primeira forza nas últimas eleccións xerais do ano 2019. O PSOE é primeira forza nos 15 municipios galegos restantes.
Os populares tamén superan o 50 % de apoios en máis da metade do total de municipios e pasan de dez a 13 escanos no Congreso. E ademais, a formación que lidera Alfonso Rueda, con Alberto Núñez Feijóo como candidato, recupera apoios nos territorios con máis habitantes de Galicia.
É o principal elemento diferencial con respecto aos comicios xerais anteriores, cando os socialistas galegos mandaban nas prazas urbanas e zonas máis poboadas. Así, os populares son os que reciben máis apoios en todas as grandes cidades fóra de Vigo, onde se impón o PSOE como o máis votado; pero tamén recuperan forza nas principais localidades máis poboadas que seguen ás sete urbes en todas as provincias.
Neste caso, o elemento diferencial está de novo na provincia pontevedresa, con Redondela, onde os socialistas se sitúan como primeira forza (cunha porcentaxe de apoios superior ao 36 %). Xunto con Vigo e Redondela, os socialistas son primeira forza na Illa, O Grove e Fornelos de Montes (nesta última localidade obteñen a mellor porcentaxe de apoios da provincia: un 43,46%).
Pola súa banda, na provincia de Pontevedra, os populares teñen o mellor resultado no que respecta a porcentaxe de voto en Dozón, onde acaparan o 70,12 %. E Sumar, o espazo liderado por Yolanda Díaz, obtén a mellor porcentaxe de apoio en Cangas, onde roza o 20 % dos votos; logrando en Moaña o 15,47%.
SUMAR SUPERA O 15 % EN FERROL E VARIOS MUNICIPIOS DA SÚA CONTORNA
Do mesmo xeito que en Cangas, Moaña e algunha outra localidade da provincia de Pontevedra, nos resultados déixase sentir a influencia da cidade de Yolanda Díaz e a súa contorna.
En Ferrol, Sumar é terceira forza, tras PP e PSOE, cunha porcentaxe do 17,01 % dos votos. Tamén en Fene logra o 17,66 %, o 18,20 % en Mugardos e o 16,34 % en Narón. Dentro da provincia coruñesa, Sumar consegue o 15,85 % de votos na Pobra do Caramiñal. Nin na provincia de Lugo nin en Ourense achégase Sumar a porcentaxes similares en ningunha localidade.
Máis aló, na provincia coruñesa, o PSOE é primeira forza en dous dos 93 municipios: A Capela e Corcubión. No resto de concellos manda o PP en porcentaxe de voto (obtén máis do 50 % en 38 e máis do 60 % en catro).
LUGO: O MELLOR RESULTADO PORCENTUAL DO PSOE, EN PEDRAFITA
No caso de Lugo, o PP é o máis votado en 63 de 67 municipios. As excepcións onde os socialistas se sitúan como primeira forza son A Fonsagrada, Negueira de Muñiz, Ribeira de Piquín (onde rozan o 50 % de apoios) e Pedrafita do Cebreiro.
No caso de Pedrafita, o PSdeG obtén o 52,53 % dos apoios, o mellor resultado porcentual que teñen na comunidade.
Os populares superan o 50 % de votos ao redor de 45 concellos de Lugo e sitúanse por encima do 67 % en Carballedo, Friol, Paradela e Guntín.
O BNG CAE NO FEUDO DE ALLARIZ
No caso da provincia de Ourense, os populares son os máis votados en 88 dos 92 concellos. Os socialistas impóñense en Carballeda de Avia, Parada de Sil, Entrimo e Calvos de Randín (onde conseguen o 48,97 % dos votos emitidos, a súa mellor marca ourensá en termos porcentuais).
En Ourense, os populares superan o 50 % de votos en máis de 65 municipios e logran as súas mellores porcentaxes de apoio de toda a comunidade. Por encima do 81 % están en Quintela de Leirado, Beariz e Avión (única localidade na que Vox ten representación institucional en Galicia e onde os populares conseguen a súa mellor marca porcentual autonómica: 81,31% dos votos que entraron nas urnas).
E fronte ao ocorrido nas últimas eleccións estatais de 2019, onde o BNG foi a forza máis votada en Allariz (foi entón o único municipio no que se impuña fronte a PSOE ou PP), pasa nesta praza a terceira forza por detrás de PP e PSOE. O mesmo lle ocorre noutros feudos municipais como Pontevedra (onde xa é habitual o xiro de tendencia en xenerais).
O Bloque, en total, logra situarse como segunda forza en tres localidades galegas, dúas delas de Ourense (A Teixeira e Vila de Santos), en ambos os casos por detrás do PP. Tamén se sitúa como segunda forza, por detrás dos populares, no municipio coruñés de Moeche.
CAÍDA XERAL DE VOX
E se Vox subira unha alza nas últimas xerais en todo o territorio galego, o seu retroceso pálpase nas catro circunscricións xudiciais neste 23J. Nin sequera en Avión (Ourense), onde ten unha edila no municipio varía esta tendencia. E se en novembro de 2019 lograba superar o 10 % de apoios nunha vintena de municipios, o escenario agora é moi distinto.
Con todo, a formación consegue situarse como terceira forza nalgunhas localidades ourensás como O Barco, Punxín ou Quintela de Leirado; así como en Triacastela (Lugo).
COALICIÓN DE CENTRO DEMOCRÁTICO É O PARTIDO MENOS VOTADO
A formación que menos votos obtivo en Galicia foi Coalición de Centro Democrático (CCD), que só concorría en Ourense, e que suma 100 votos.
A continuación, con menos apoios da cidadanía están PUM+J, que acumula 216; PCTG, con 614; e Recortes Cero, con 1.207.
