O BNG reclama á Xunta que elabore un protocolo para combater as agresións sexuais no lecer nocturno
Os nacionalistas lembran que a Cámara autonómica xa aprobara en febreiro unha proposición non de lei, por unanimidade, para elaborar esta guía.
Por E.P. | SANTIAGO DE COMPOSTELA | 21/08/2023 | Actualizada ás 17:37
A deputada do BNG Noa Presas presentou no Parlamento galego varias iniciativas para volver esixir á Xunta que acelere a posta en marcha dun protocolo de prevención e intervención contra as agresións sexuais no lecer nocturno.
Os nacionalistas lembran que a Cámara autonómica xa aprobara en febreiro unha proposición non de lei, por unanimidade, para elaborar esta guía. Neste contexto, o Bloque urxe a facela ante os últimos acontecementos rexistrados nas últimas semanas.
"Lamentablemente, no verán de 2023 coñecemos agresións sexuais múltiples a través dos medios de comunicación que nos lembran a necesidade de avanzar, como é o caso da violación de dous agresores no Porriño a unha moza no contexto dunhas festas ou a agresión sexual tamén cometida por dous mozos nas festas de Monforte en agosto", relata Presas.
De feito, a deputada do BNG pon o acento en que, de acordo cos datos de criminalidade do Ministerio do Interior, entre xaneiro e marzo de 2023 denunciáronse en Galicia 43 agresións sexuais con penetración, un 10,3 por cento máis que no mesmo período do ano pasado e máis da metade das que se produciron ao longo de todo o 2021. Se se observan todos os delitos contra a liberdade sexual, subiron de 148 a 192, un 29,7 por cento máis no primeiro trimestre deste ano con respecto ao anterior.
Así, mentres Presas reivindica unha concienciación, unha educación e unha prevención "que non recaia na responsabilización das mulleres nin na limitación da súa liberdade", empraza á Xunta a acelerar a aprobación deste protocolo, tendo en conta que "o goberno do PP informou de que a comezos de xuño estaría xa operativo para a súa aprobación e divulcación, pero neste momento segue sen ser unha realidade".
Xunto a isto, o BNG reclama que xa no curso académico 2023/24 póñase en marcha unha campaña específica sobre a violencia sexual e os recursos no ámbito da educación secundaria e universitaria.
