Ana Miranda denuncia no Europarlamento a "contaminación" da mina de San Finx na ría de Muros e Noia
A eurodeputada do BNG apunta que están "a incumprirse" directivas europeas, como son o directiva marco de auga pola contaminación que provoca nos ríos próximos á mina e á ría.
- Guerra de denuncias no conflito da mina de San Fins
- O BNG esixe a paralización "de inmediato" das verteduras de augas residuais da mina de San Finx
Por E.P. | SANTIAGO DE COMPOSTELA | 12/09/2023 | Actualizada ás 13:28
A eurodeputada do BNG, Ana Miranda, denunciou na Eurocámara a contaminación na mina de San Finx, o que supón "un risco ambiental, económico e social" para unha ría como a de Muros-Noia, rica en peixe e marisco.
Ao seu xuízo, están "a incumprirse" directivas europeas, como son o directiva marco de auga pola contaminación que provoca nos ríos próximos á mina e á ría: a directiva de información ambiental, porque "non houbo posibilidade de acceder aos informes" de forma transparente; e a directiva de tratamento dos residuos.
Durante a súa intervención no debate sobre contaminantes das augas superficiais e subterráneas, Miranda lembrou que existe unha petición aberta da Comisión de Peticións da Eurocámara na que denuncia a contaminación provocada polas verteduras da mina.
"A pesar dos requirimentos ao Goberno galego de medidas para facer cumprir a lei e resolver as irregularidades, a pesar das reclamacións na xustiza e da oposición, o Goberno galego autorizou en febreiro a descarga de catro millóns de metros cúbicos de augas residuais contaminantes", apuntou Miranda.
A parlamentaria nacionalista lembrou que, como consecuencia desta descarga, a eurodeputada nacionalista sinalou que foron detectados metais pesados nas augas, como desvelaron os informes de Augas de Galicia por mor do cal a Xunta anunciou a apertura dun expediente.
