O xuíz Taín recorrerá a sanción do CGPJ por exercer paralelamente a súa actividade audiovisual
Entende que non era necesario que pedise permiso como si fixo para acudir ás televisións.
Por Europa Press / Redacción | A CORUÑA | 15/09/2023 | Actualizada ás 14:21
O xuíz José Antonio Vázquez Taín recorrerá a sanción que lle impuxo o Consello Xeral do Poder Xudicial (CGPJ), suspensión de dez días, ao considerar que a súa participación nunha produtora audiovisual, e o labor que nela desenvolve, é incompatible co seu cargo como titular do Xulgado do Penal número 2 da Coruña.
Nunha rolda de prensa xunto á súa avogada, Beatriz Seijo, asegurou que a súa intención é que se aclaren os termos nos que pode exercer a súa actividade neste ámbito e que, de confirmarse a sanción, acataraa e cumpriraa nos días nos que non haxa fixados xuízos. Sobre o motivo do expediente, do que explicou que tivo coñecemento polos medios de comunicación, precisou que no seu día el pediu autorización para acudir aos estudios de televisión e que se lle comunicou que podía e que tampouco facía falta que o solicitase.
"Non solicitei autorización para o exercicio de guionista ou director porque a lei di que para as actividades artísticas non é necesario solicitalo", insistiu o xuíz Taín, quen apostilou que "non di en ningún lado que teña que facelo como persoa física". "A discusión é se o podo facer como persoa xurídica ou me teño que limitar a facelo como persoa física e con outras produtoras", apostilou en referencia á súa vinculación empresarial coa produtora coa que fixo o documental 'El camino mozárabe: sangre, sudor y fe', o que motivou a orixe do expediente.
SUSPENSIÓN DA SANCIÓN
"Quero que quede claro en que termos podo facer unha actividade que me gusta", dixo Vázquez Taín, quen ratificou que pediu xa autorización como persoa física para poder escribir guións e tamén para ser director, en caso de consideralo. Sobre a sanción, tanto el como a súa avogada, que asegurou que "non hai xurisprudencia" para un caso como o que agora se suscita, Taín aclarou que se pode pedir a suspensión do cumprimento da mesma mentres non haxa "expediente firme".
Con todo, sobre o sucedido, lamentou que, no que limitou a discrepancias nunha "cuestión xurídica", se fiase "tan fino". "E non darme a oportunidade de cesar na actividade antes de sancionarme". A pesar diso, manifestou que actuará "dentro do que diga" o CGPJ e á espera de ver se os tribunais lle dan "a razón". A súa avogada, pola súa banda, quixo incidir en que no expediente remárcase que o labor que desenvolve o xuíz Taín de maneira paralela á súa actividade xudicial "non entorpeceu" o seu labor no xulgado.
"Trátase dun expediente disciplinario reservado pero que estivo sempre nos medios de comunicación", afirmou, á súa vez, Vázquez Taín, quen recalcou que non hai "ningún parágrafo" que diga que a actividade vinculada ao ámbito audiovisual por un xuíz "teña que se exercida como persoa física". "Crin que a podía exercer como persoa xurídica sempre que me limitase ás miñas obras e creacións", insistiu.
EXPEDIENTE
En concreto, a comisión disciplinaria do CGPJ acordou suspender ao xuíz, coñecido por ser instrutor de casos como o do roubo do Códice Calixtino da Catedral de Santiago ou do asasinato de Asunta, durante 10 días por unha "falta moi grave". Foi o pasado xuño cando se deu a coñecer que o CGPJ abrira un expediente disciplinario ao xuíz galego despois de que o promotor da acción disciplinaria do órgano comprobase que Vázquez Taín exercía outras actividades alleas á xudicatura sen solicitar o permiso necesario.
