A Mesa pola Normalización Lingüística presiona en Bruxelas para conseguir o si dos 27 á oficialidade do galego

Organizacións de defensa do catalán, eúscaro e galego presionaron este luns desde Bruxelas para que os Estados membros da Unión Europea aproveiten a "oportunidade histórica" e dean o 'si' á oficialidade das tres linguas na reunión do Consello de Asuntos Xerais deste martes. Nunha rolda de prensa celebrada na sede do Parlamento Europeo en Bruxelas, case unha decena de asociacións pediron que os Estados membros "renoven o compromiso coa diversidade lingüística e cultural" e apoien a proposta de España para o recoñecemento do catalán, o galego e o eúscaro como linguas oficiais da UE.

Elsa Quintás, da Mesa pola Normalización Lingüística, insistiu nas implicacións que tería o recoñecemento da oficialidade para o galego en cuestións audiovisuais, de etiquetaxe de alimentos e produtos sanitarios e de uso institucional en Europa. "Un marco lexislativo é necesario para protexer os dereitos dos galegoparlantes", reclamou.

O representante da Rede Europea de Igualdade Lingüística (ELEN), Davyth Hicks, valorou a proposta de España para modificar o regulamento sobre linguas oficiais e que o Goberno se ofrecese a asumir o custe do uso destas linguas cooficiais. "Todas son linguas europeas e todas merecen respecto e apoio", sostivo.

APOIO DO BNG

Pola súa banda, a eurodeputada do BNG, Ana Miranda, apoiou a iniciativa e defendeu que se trata de "dereitos lingüísticos". "Os galegos debemos ser tratados con igualdade en Europa, porque non se pode entender Europa sen a diversidade de nacións e linguas dos pobos europeos", explicou. Miranda subliñou que o BNG defende a "diversidade lingüística e cultural que representan as nacións sen estado, fronte ás políticas de uniformización impostas polos estados e, por activa ou por pasiva, avaladas pola UE".