Unha ducia de concellos súmanse a 'Toponimízate', a campaña da RAG para recuperar nomes en risco de perderse

A Xunta de Galicia e a Real Academia Galega incorporan doce novos concellos das catro provincias galegas á nova edición da campaña 'Toponimízate', que busca recuperar nomes de lugares en risco de perderse. Destacan que esta iniciativa busca "salvagardar e divulgar o importante patrimonio inmaterial que atesoura a toponimia galega".

Así o puxo en valor na súa presentación o secretario xeral de Lingua, Valentín García, que destacou "os resultados máis que satisfactorios" deste proxecto, "ao contar con case 4.000 colaboradores e preto de 90.000 microtopónimos recuperados desde que se puxo en marcha en 2019". Neste sentido, o representante da Consellería de Cultura mostrou o seu convencemento de que, coa posta en marcha desta nova edición, "váiselle dar un importante ánimo ao incorporar máis persoas e entidades que se van a sumar agora a este proxecto".

Para facelo, lembrou que a iniciativa inclúe a "innovadora aplicación" 'Galicia Nomeada', a través da cal os colaboradores poden achegar nomes de lugares, montes, leiras, fontes, camiños, arroios, ou devesas dos que teñan constancia "evitando que cheguen a perderse". Por estes motivos, destacou o traballo que está a desenvolver o Goberno galego na preservación "dunha das grandes riquezas da lingua galega" con esta campaña, á que erixiu como "referente" na colaboración entre as administracións públicas e a cidadanía para preservar o patrimonio inmaterial toponímico.

A campaña efectuará 12 reunións de traballo para que os veciños destes doce municipios que se incorporan aprendan a empregar a aplicación, que serviu de modelo para outras comunidades. Estas charlas formativas comezarán o próximo 20 de xuño no municipio ourensán de Sandiás e prolongaranse ata o 14 de novembro, que será cando finalice esta edición no municipio lucense de Baralla. Neste período, percorrerá as catro provincias con formacións en Baños de Molgas, Laxe, Chantada, Melón, A Estrada, Cervantes, Mondariz e Mondariz Balenario, Dozón e Val do Dubra.

Presentación da campaña 'Toponimízate' da Xunta e a Real Academia Galega. XUNTA DE GALICIA | Fonte: Europa Press