12 nómades dixitais de todo o mundo gozarán de Galicia mentres teletraballan
A Deputación da Coruña promove en Carnota un proxecto para combinar turismo e teletraballo no rural.
Por Europa Press / Redacción | SANTIAGO DE COMPOSTELA | 26/09/2023 | Actualizada ás 13:59
O vicepresidente da Deputación da Coruña e responsable da área de Turismo, Xosé Regueira, e o alcalde de Carnota, Juan Manuel Saborido, asinaron un convenio para o financiamento do proxecto piloto 'Galicia Remota', un novo modelo de "turismo, innovación e sustentabilidade" que pretende converter o rural en "un polo de atracción de traballadores remotos".
Segundo informa a institución provincial, "un grupo de 12 nómades dixitais internacionais" residirán durante tres semanas, do día 8 ao 30 de outubro, no municipio. Durante a súa estancia, realizarán distintas actividades como talleres, visitas culturais ou coloquios.
O obxectivo desta iniciativa, engade, é que as persoas que poidan desenvolver o seu labor profesional a través do teletraballo "desde calquera lugar do mundo, vexan unha oportunidade na que vivir experiencias únicas de crecemento persoal e profesional e descubran novos lugares, ao mesmo tempo que desenvolven o seu traballo en liña".
Noutra orde de cousas, a Deputación da Coruña publicou este martes, no Boletín Oficial da Provincia (BOP), a concesión definitiva das subvencións a entidades deportivas da provincia sen ánimo de lucro para infraestruturas e equipamento deportivo. As axudas van destinadas este ano a 80 entidades deportivas cun investimento total de 568.579,88 euros.
