O Concello de Pontevedra pide á hostalaría volver á normativa anterior ao covid en terrazas e veladores

O Concello de Pontevedra remitirá unha carta a todo o sector da hostalaría da cidade na que solicita a súa colaboración para corrixir "pequenos desaxustes" que se detectaron na instalación das terrazas, especialmente no centro histórico. O alcalde de Pontevedra, Miguel Anxo Fernández Lores, informou desta iniciativa do goberno local e detallou cales son eses "desaxustes que podemos observar todos" como o volume excesivo de veladores nalgúns puntos ou terrazas que dificultan a circulación dos peóns.

O rexedor da capital explicou que pasada a pandemia "houbo certa laxitude porque o sector o estaba pasando mal", pero agora o Concello entende que estes establecementos deben volver axustarse á normativa aprobada para "mellorar o espazo público". Nesta misiva, o Consistorio de Pontevedra tamén lembrará aos hostaleiros as súas obrigacións en materia de limpeza, de recollida de veladores, de ocupación do espazo público ou as prohibicións vixentes, como a presenza de publicidade nos veladores.

Tamén incidirá na obrigación de respectar o dereito ao descanso dos cidadáns, especialmente dos que viven nas zonas con maior presión de veladores. Lores dixo estar "convencido" de que "vai colaborar todo o mundo" e felicitou a toda a hostalaría local polo seu traballo, recoñecendo que "lle dan vida á cidade e animan o espazo público". En xeral, "funcionan correctamente", polo que confía nesta vía de "diálogo e confianza" para respectar a regulación existente.

Varias persoas na terraza dun restaurante durante o primeiro día da apertura parcial da hostalaría | Fonte: Marta Vázquez Rodríguez - Europa Press - Arquivo