A ONCE entrega os seus premios solidarios á Fundación María José Jove e a Axencia de Doazón de Sangue
Tamén a Estrella Galicia, o programa 'Pensando en Ti' e á xornalista Cristina Saavedra.
Por Europa Press / Redacción | A CORUÑA | 05/10/2023 | Actualizada ás 20:28
A Fundación María José Jove; 'Pensando en Ti', programa de Radio Galega; Cristina Saavedra, Estrella Galicia e a Axencia de Doazón de Órganos e Sangue recibiron os Premios Solidarios do Grupo Social ONCE en Galicia 2023, durante unha gala celebrada este xoves na Coruña.
Trátase da máxima distinción que o Grupo Social ONCE concede a nivel autonómico, distinguindo a aquelas persoas, empresas, organizacións non gobernamentais, entidades e organismos da Administración Pública e programas ou traballos de comunicación que destacasen por un labor solidario.
Na gala participaron representantes do grupo ONCE e de institucións tanto locais como da Xunta. Nela, destacouse o labor da Fundación María José Jove pero tamén o programa 'Pensando en Ti', de Radio Galega, que se emite de madrugada todos os días da semana. O Solidarios para a Persoa Física foi para Cristina Saavedra, xornalista galega, presentadora do informativo de La Sexta polo seu labor solidario a través de entidades como Global Humanitaria.
Na categoría de Empresa, o premio foi para Estrella Galicia que, tras a pandemia, pechou un acordo coa Federación Española de Bancos de Alimentos con diversas accións que emprendeu en todo o territorio nacional. O Solidarios na categoría de Estamento da Administración Pública correspondeu á Axencia de Doazón de Órganos e Sangue, que cumpre 30 anos, período no que galegos e galegas realizaron máis de tres millóns de doazóns de sangue, destaca o grupo ONCE.
