Produtores de aceite e oliva en Galicia encaran a colleita deste ano con cautela
"Hai expansión, pero é moderada", indica sobre esta actividade Alfonso Rodríguez, presidente da Asociación de Produtores de Aceite e Oliva de Galicia (Apaag), que conta cuns 150 produtores, a inmensa maioría en producións locais e de pequena extensión.
Por Europa Press / Redacción | SANTIAGO DE COMPOSTELA | 14/10/2023 | Actualizada ás 13:05
O sector de produtores de aceite e oliva en Galicia móstrase cauteloso sobre os resultados da colleita deste ano, que se está iniciando. "Hai expansión, pero é moderada", indica sobre esta actividade Alfonso Rodríguez, presidente da Asociación de Produtores de Aceite e Oliva de Galicia (Apaag), que conta cuns 150 produtores, a inmensa maioría en producións locais e de pequena extensión.
"Ao redor desta fin de semana, comezarán en zonas como Quiroga", sinalou sobre a recollida. Respecto ao proceso, aclara que "hai varios métodos" e que en Galicia se fai maneira manual, "cuns peites ou anciños que atrapan a oliva e caen nuns paraugas ou lonas ou tamén con vareadoras mecánicas que axitan as ramas e lánzanas ás lonas" polo que non chegan a tocar o chan.
"Normalmente comezamos durante a segunda quincena de outubro e o mes de novembro", explica tamén sobre o período no que se leva a cabo. Ademais, precisa que na comunidade autónoma empézase a recoller cando empeza a madurar. "Trátase dunha recollida en verde, nesta primeira etapa da maduración, que fai que o aceite extraído sexa da máxima calidade".
"Este ano veremos a produción total de plantacións da asociación, porque temos zonas con resultados dispares", apunta ao ser cuestionado sobre como será a colleita polo que evita aventurarse con cifras ou se será boa. Sobre a traxectoria en Galicia desta actividade, sinala que "a oliveira é un cultivo que ten unha longa historia e sempre estivo presente en determinadas zonas de Galicia". "Circunstancias históricas fixeron que houbese zonas onde foi interrompido", manifestou. Non entanto, apostilou que desde os últimos 10 ou 15 anos está "a recuperarse". Ademais, engadiu que hai outras zonas "como Quiroga ou Valdeorras onde nunca se interrompeu a produción".
DESTINO
Respecto desta, asegura que "a maioría se fai para autoconsumo e logo hai algunhas marcas que envasan aceite de oliva virxe extra". "Hai menos dunha decena que comercializan marcas propias", precisa. "O mercado, ao ser tan pequeno, fai que a maioría quede na comunidade ou nalgunhas tendas delicatessen das principais cidades". Sobre o produto, sinala que se fan aceites de oliva virxe extra "de máxima calidade, recollendo de plantacións propias ou comprando a outras plantacións".
"Para iso a Asociación ten un selo que garante que o aceite que é procedente de plantacións galegas 100 %, xa que hai bastante intrusismo tamén", asevera o seu presidente que afirma que "é importante asesorarse moi ben para ver a viabilidade de plantar". "O cultivo de oliveiras é unha aposta para pór en valor terreos, aínda que, como todo, require un investimento e uns recursos que hai que valorar", recalca tamén.
