O Carballiño rexistra dous terremotos de magnitudes 2,9 e 1,8 na madrugada deste xoves percibidos polos veciños

O Concello do Carballiño, na provincia de Ourense, rexistrou na madrugada deste xoves dous terremotos de baixa intensidade.

Os tremores con epicentro na vila do Arenteiro producíronse con menos de dez minutos de intervalo entre un e outro. Así, o primeiro tivo lugar ás 23.59 horas e o segundo ás 00.06 horas, segundo os datos do Instituto Xeográfico Nacional.

O primeiro dos terremotos tivo unha magnitude de 2.9 e o segundo de 1.8, o que os sitúa como de baixa intensidade, pero producíronse a tres quilómetros de profundidade, polo que puideron ser percibidos polos veciños.