Rifa tras dicir Rueda ao BNG: "Desprezan aos maiores de 65 anos porque din que non saben votar"
Os nacionalistas pediron a palabra para recriminarlle ao presidente galego estas palabras que decidiu marchar do hemiciclo acompañado de varios conselleiros.
Por Europa Press / Redacción | SANTIAGO DE COMPOSTELA | 25/10/2023 | Actualizada ás 12:00
O hemiciclo galego foi escenario dunha rifa política ao termo da sesión de control ao presidente da Xunta, Alfonso Rueda, despois de que o líder do PPdeG ligara un anuncio para maiores de 65 anos con que a medida vai a ese colectivo que "o BNG despreza porque di que non saben votar".
O enfado na bancada nacionalista provocou que a portavoz nacional do BNG, Ana Pontón, pedise a palabra ao abrigo do artigo do Regulamento que alude a aclarar imprecisións para reclamar a retirada desa expresión e denunciar que se diga que o BNG "despreza aos maiores porque din que non saben votar".
Como o mandatario galego non reaccionou a esta reclamación, o presidente da Cámara, Miguel Santalices, interveu para dicir que estaba no seu dereito de achegar no debate ou non, o cal seguiu causando enfado na bancada nacionalista e, no medio da rifa política, Rueda e case todos os conselleiros levantáronse e abandonaron o hemiciclo galego mentres Santalices xustificaba que se mantivese a expresión como parte do "debate político".
Tras a rifa, o primeiro en saír á tribuna foi o viceportavoz do Grupo do BNG, Luís Bará, quen nun ton visiblemente de indignación acusou a Rueda de "desprezo" á Presidencia do Parlamento. Entre un sonoro aplauso dos seus compañeiros de grupo, Bará censurou que "cando estaba a falar o presidente do Parlamento, marchou o presidente sen pedir desculpas". "Cando estaba no uso da palabra o presidente?. Pode haber maior desprezo a esta institución?", preguntouse Bará, quen concluíu que "non merece" ser o presidente da Xunta e quen cualificou que "é unha auténtica vergoña e unha indecencia" o "desprezo" á Cámara.
Tomou a palabra o propio Santalices, a continuación, para asegurar que non se sentía "deshonrado" polo mandatario galego. "Aquí hai liberdade para marchar ou non", defendeu o xefe do Lexislativo sobre Rueda, quen ten un acto público programado para as 12,30 horas en Salvaterra do Miño, unhas dúas horas despois da sesión de control.
