O alcalde de Ourense mandou derrubar a casa de Reza o primeiro día dos tres meses que tiña para facelo
O avogado da familia afectada recorrerá ao Tribunal Superior de Xustiza de Galicia e lembra que o xuíz que fallou en contra do recurso é o mesmo que ordenou a demolición da casa.
Por Galicia Confidencial | Ourense | 13/06/2015 | Actualizada ás 09:00
O alcalde de Ourense, Agustín Fernández, decidiu derrubar casa de Reza tras recibir o pasado 10 de xuño a notificación do xulgado. Un que ordenaba ao Concello tirar coa casa durante os tres meses seguintes. É dicir, que non agardou nin un día para executar a sentenza.
O xulgado de Ourense desestimou a medida cautelar solicitada pola propietaria da vivenda de Reza, Rosa Alonso, para pedir a suspensión da demolición da súa casa. Unha medida que xa era inviable porque o pasado mércores comezara o derrubo da súa vivenda.
No auto o xuíz esgrime que o Concello de Ourense "non necesita darse a si mesma licenza nin autorización urbanística para poder executar unha orde xudicial firme" tras asegurar que "unha vez acordada xudicialmente", "non se require licenza municipal para a demolición".
Ademais, criticase que a propietaria "non só non recorreu o auto senón que en todo o mes transcorrido desde entón non manifestou nada no devandito proceso xudicial". Unha aseveración que o letrado de Miguel Fernández di que é "falsa" porque lembra que a afectada solicitou un escrito ao consistorio, do 30 abril de 2015, "sen recibir contestación" e lembrou que non existe proxecto de demolición.
Ademais, critica que o xuíz que asina este novo auto "é o mesmo que ordenou a demolición" polo que pedirá "revisar de principio a fin todo o procedemento administrativo e esixir as responsabilidades oportunas". E avanzou que pensa recorrer devandito auto ante o Tribunal Superior de Xustiza de Galicia, a pesar de que xa se está executando a demolición.
