Piden 28 anos de cárcere para o acusado de perseguir ata matar dun disparo a unha muller en Oza-Cesuras

A sección primeira da Audiencia Provincial da Coruña xulgará a partir do próximo xoves, día 9, con Tribunal do Xurado, a un home acusado de matar a unha muller dun disparo na cabeza no municipio coruñés de Oza-Cesuras. Fiscalía pide para el unha pena de 25 anos de prisión polo delito de asasinato e tres anos de cárcere por tenencia ilícita de armas.

No seu escrito de cualificación, o Ministerio Público sostén que, sobre as 18.50 horas do 15 de xaneiro de 2021, o acusado "accedeu sorpresivamente e armado" ao domicilio da falecida, situado no citado municipio coruñés, "coa intención de acabar coa vida" dela. Sobre o sucedido, explica que a vítima "se atopaba fráxil e convalecente dunha operación á que fora sometida esa mesma semana" e que se atopou co home. Nese momento, produciuse por parte deste unha persecución, desde a entrada da propiedade ata a planta superior, tratando de fuxir a muller.

"Así, seguida en todo momento polo acusado, tentou escapar saíndo pola xanela do cuarto de baño da planta superior da vivenda, que se abre sobre o tellado do garaxe do inmoble, atravesou o citado tellado e, tratando de salvarse do ataque do acusado, desde esa altura, saltou ao chan e caeu", recolle o escrito de cualificación fiscal.

SEN POSIBILIDADE DE DEFENSA

Tras ela, fíxoo tamén o home. "Nese mesmo lugar, coa vítima lesionada e débil e, coa finalidade de darlle morte, sen posibilidade algunha de defensa, disparoulle mortalmente no cranio coa arma de lume que portaba, unha pistola semiautomática". "O disparo por arma de fogo e a perforación cranial foron a causa da morte", conclúe o Ministerio Fiscal que pide penas que suman 28 anos de prisión.

En concreto, considera estes feitos constitutivos dun delito de asasinato, polo que solicita unha pena de 25 anos de prisión, e outro de tenencia ilícita de armas, polo que pide tres anos de cárcere. Tamén expón o pago de indemnizacións aos familiares da vítima, entre elas o seu fillo e o seu marido.

INVESTIGACIÓN

Inicialmente, sobre este caso, as hipóteses da investigación centráronse en que o home entrou na vivenda coa intención de roubar e puido ser sorprendido pola muller, aínda que logo descartouse e apuntouse a que o acusado, veciño de Culleredo, coñecíaa. O presunto autor dos feitos foi detido tras ser localizado oculto nunhas matogueiras, con abundantes manchas de sangue na súa roupa. Nun primeiro momento, tentou despistar aos axentes indicando que se atopaba paseando pola zona e lesionouse nun pé, segundo apuntou a Garda Civil. Pouco despois entrou en parada cardiorespiratoria e tivo que ser trasladado a un hospital.

Audiencia Provincial de Xustiza, os seus xulgados na Coruña | Fonte: Arquivo