O TSXG anula a sentenza que absolveu a un home do Milladoiro acusado de agredir sexualmente á súa exparella

O Tribunal Superior de Xustiza de Galicia (TSXG) anulou a sentenza da Audiencia Provincial da Coruña que absolveu a un home acusado de violencia habitual, lesións e agresión sexual contra a súa exparella.

Tanto o Ministerio Fiscal como a acusación particular presentaron recurso contra o fallo e o alto tribunal galego deu a razón a Fiscalía, que solicitou a nulidade da resolución xa que incorre "nun evidente defecto de motivación e nunha irracional valoración da proba".

Concretamente, o que cuestionou o Ministerio Fiscal foi que a sentenza "sinala implicitamente" que non pode descartarse a comisión dos delitos imputados, xa que "invoca a concorrencia de dúbidas" e decántase por aplicar o principio de 'in dubio pro reo' --en caso de dúbida debe fallarse a favor do acusado--.

O home e a muller mantiveron unha relación sentimental desde xullo de 2016 ata o mes de setembro de 2018, cando ela rompeu a relación e deixou a vivenda.

O 30 de abril de 2019 a muller compareceu ante a Garda Civil do Milladoiro para denunciar ao home por malos tratos físicos e psíquicos, así como por agresións sexuais durante a relación.

Destes feitos, o home foi absolto pola Audiencia da Coruña xa que "non quedou debidamente acreditado que cometese eses feitos". Fronte a isto, a acusación particular solicitou que se condenase ao acusado dos delitos que se lle imputaron e o Ministerio Fiscal pediu a nulidade da resolución e celébrese un novo xuízo.

INFORMES DO IMELGA

O TSXG considera que deben terse en conta, que non se tiveron, os diferentes informes psicolóxicos da denunciante, sobre todo o do Instituto de Medicina Legal de Galicia (Imelga), que concreta que o relato da muller sobre a a súa relación co denunciado "é compatible" cunha situación de violencia de xénero, ao que se engade o estado psíquico que presentaba a denunciante no momento da valoración forense.

Ademais, segundo a sentenza, no informe do Imelga recolleron que tiveron que avaliar ao denunciado no outro procedemento xudicial, tamén por violencia de xénero.

Por todo iso, o alto tribunal galego desestima o recurso de apelación da acusación particular, estima o recurso do Ministerio e anula a sentenza da Audiencia de Pontevedra con devolución das actuacións para un novo xuízo.