Aprobados os membros do relatorio da nova lei galega para o traspaso da AP-9: Balseiro, Bará e Patricia Otero

A comisión de Ordenación Territorial da Cámara galega designou este venres aos membros do relatorio para a elaboración da nova lei galega para o traspaso da AP-9. En concreto, formarán parte do relatorio polo Grupo Popular o deputado José Manuel Balseiro como titular e o portavoz parlamentario, Alberto Pazos, como suplente. Pola súa banda, o titular polo Bloque Nacionalista Galego será Luís Bará e o deputado Paulo Río figurará como suplente. Ademais, a titular polo Grupo Socialista será a parlamentaria Patricia Otero e como suplente figurará Begoña Rodríguez Rumbo.

O pasado mes de setembro, o Parlamento de Galicia aprobou por cuarta vez unha proposición de lei para remitir ao Congreso dos Deputados para a transferencia á comunidade da titularidade e as competencias da Autoestrada do Atlántico, a AP-9. Fíxoo por unanimidade do tres grupos políticos con representación na Cámara (PPdeG, BNG e PSdeG), despois de que o texto anterior caese coa disolución das Cortes tras a convocatoria das eleccións xerais do 23 de xullo.

Saída da AP-9 á Cidade da Cultura, en Santiago de Compostela | Fonte: AUDASA - Arquivo