María Jesús Lorenzana ve a Galicia coa capacidade para "converterse nun referente na industria que vén"

A conselleira de Economía, Industria e Innovación, María Jesús Lorenzana, destacou este venres a aposta que está a facer a Xunta de Galicia por abrir as portas ao capital investidor que mobiliza a transición enerxética, ofrecendo "simplificación administrativa, seguridade xurídica e estabilidade".Así o sinalou na noite deste venres durante a súa intervención no acto de celebración do décimo aniversario de BNI Galicia, onde apuntou que o Goberno autonómico traballa por xerar un clima favorable para a actividade empresarial, co obxectivo de que a economía galega siga crecendo e xerando emprego de calidade e captando novos proxectos.

Lorenzana recoñeceu que o papel que teñen que desempeñar as administracións é o de acompañar ao tecido empresarial, pondo ao seu alcance todas as facilidades posibles para que poida dar o salto dixital, integrar a enerxía renovable e revalorizar a cadea de produción ou o seu negocio. Para ela, Galicia ten que ser "a opción" no actual contexto, porque ten capacidade instalada para converterse nun referente na industria que vén, que é, ao seu xuízo, a industria 'verde'.

A conselleira concluíu felicitando a BNI polo seu labor como nexo de unión e punto de conexión entre empresas e por compartir coa Administración a necesidade de estar á beira do tecido empresarial.

Lorenzana nas instalacións do Grupo Nogar. | Fonte: XUNTA