Unha sentenza recoñece a un pai o permiso por nacemento e coidado dun fillo falecido no parto

O Tribunal Superior de Xustiza de Galicia (TSXG) confirma unha sentenza dun xulgado do social de Ourense que recoñece a un pai o permiso por nacemento e coidado dun fillo falecido no parto. Ante o fallo, a CIG insta o Instituto Nacional da Seguridade Social a "que non se limite a aplicar a sentenza que é firme, senón a recoñecer este dereito a todos os proxenitores diferentes da nai biolóxica que pasen polo falecemento dun fillo". En marzo de 2022, un xulgado do social de Ourense determinou que a Seguridade Social "vulnerara o dereito dun pai", advirte a central nacionalista, a manter o permiso por nacemento e coidado do fillo "nas mesmas condicións" que a nai biolóxica. A sentenza dáballe a razón a un traballador representado pola CIG-Ensino que reclamaba "o mesmo dereito que a nai" a dispor integramente do permiso que recolle a lexislación.

O alto tribunal galego conclúe que o principio de corresponsabilidade, como integrante do de igualdade entre homes e mulleres, non pode entenderse só referido a a atención do fillo recentemente nado, senón que ha de estenderse ao cumprimento corresponsable do resto de deberes que o código civil impón a ambos os membros da parella respecto de descendentes, ascendentes e demais persoas ao seu cargo "e á asunción compartida de todas as cargas familiares". Isto, subliña a sentenza, en "un momento en que a perda dun fillo orixina unha situación de especial vulnerabilidade necesitada de idéntica protección para os dous proxenitores".

A CIG considera que "os efectos" deste fallo, que afecta a un traballador dunha empresa privada, "tamén se estenderían ao ámbito do sector público", xa que a negativa á concesión do dereito está vinculada ao non recoñecemento pola Seguridade Social da suspensión do contrato e o abono das bases de cotización durante a duración do permiso.

"Instamos o Goberno do Estado a dar os pasos necesarios para que este dereito se recoñeza de agora en diante, evitando que outras persoas se teñan que ver na obrigación de denunciar despois de pasar pola morte do seu fillo", subliña a CIG. Para iso, solicita "que se dean as instrucións necesarias" á Seguridade Social por parte do ministerio "para que este dereito sexa unha realidade xa para todas as persoas que teñan que atravesar por unha situación tan dura".

Sala para xuízos con tribunal de xurado na Audiencia da Coruña | Fonte: TSXG - Arquivo