Galicia avanza na protección de especies ameazadas como a píllara das dunas e o zarapito real

Galicia fixo avances na protección de especies ameazadas como a píllara das dunas e o zarapito real. Así o constataron este venres na 16ª reunión ordinaria do Observatorio Galego de Biodiversidade, presidida a través de videoconferencia pola directora xeral de Patrimonio Natural, Belén do Campo.

No encontro, segundo relatou a Xunta, expuxéronse as liñas de traballo actuais para a conservación das especies en perigo, e deuse conta dos resultados dos programas de conservación e seguimento postos en marcha pola vicepresidenta segunda e a Consellería de Medio Ambiente, Territorio e Vivenda, en colaboración con investigadores da Universidade de Santiago de Compostela (USC).

O seguimento realizado ao longo deste 2023 á píllara das dunas permitiu observar 84 parellas, catro máis que na anterior campaña. Ademais, ao longo deste ano realizáronse actuacións de protección de 86 niños da ave, en 19 praias distintas de toda Galicia; traballos de conservación como incubacións; e outras accións de conservación enmarcadas en proxectos como o Interreg Iberalex, no que participan o Goberno autonómico e a USC.

Tal e como informou a Xunta, para o 2024 están planeadas tarefas de recuperación do zarapito real tanto no seu medio natural, coa protección dos niños, como en centros de recuperación, coa entrada na zona de recuperación de exemplares europeos. Na reunión, a directora xeral aproveitou para agradecer o traballo dos técnicos, vixiantes e axentes ambientais, así como do persoal dos centros de recuperación de fauna. Un traballo que cualificou como "fundamental" para a preservación da biodiversidade galega.