O PSOE de Santiago pide a Goretti que aclare se renuncia ao convenio para a Casa da Xuventude
Manterán encontros con veciños e asociacións para presentar o seu proxecto.
Por Europa Press / Redacción | SANTIAGO DE COMPOSTELA | 01/12/2023 | Actualizada ás 14:10
O secretario xeral do PSOE compostelán, Aitor Bouza, esixiulle ao bipartito local claridade sobre a Casa da Xuventude e emprazou ao goberno de BNG e Compostela Aberta a aclarar se existe unha renuncia formal ao convenio coa Deputación da Coruña. Así o manifestou este venres nunha rolda de prensa ofrecida, na que sinalou que no pleno ordinario de novembro as dúas forzas que integran o goberno local mostraron as súas discrepancias sobre este asunto.
Na súa comparecencia ante os medios, Bouza lamentou a "falta de transparencia" de Sanmartín e sostivo que de non solicitar unha comparecencia do edil responsable "nunca" coñecesen "todo o álbum de fotos da súa proposta". Bouza, que anunciou unha reunión coas asociacións veciñais e colectivos usuarios do edificio na que participará tamén o portavoz da Deputación da Coruña para explicar o proxecto de rehabilitación, afeoulle ao goberno local que non aclare se realmente existe unha renuncia formal ao acordo co ente provincial.
O xefe de filas dos socialistas composteláns mostrouse moi crítico pola postura do BNG, que "aposta por destruír en lugar de construír", e insistiu na idea de que a proposta do BNG podería integrarse na propia rehabilitación. "Non hai que destruír para que haxa unha relación do parque de Belvís co resto da cidade e garantir a accesibilidade", explicou Bouza, que sostivo que o proxecto da deputación xa contempla unha apertura cara ao parque desde a Praza do Matadoiro.
Ademais, afeoulle ao BNG o seu achegamento ao PP, unha "coincidencia sorprendente" ante a que se pregunta se o Partido Popular apoiaría os orzamentos do BNG para este tipo de proxectos. Na rolda de prensa, ademais, referiuse ás palabras do PP no pleno, nas que aseguraron que velarían polos intereses de Santiago para reclamar ao seu portavoz e deputado na Cámara galega, Borja Verea, que "actúe en consecuencia". "Se é certo que o PP vai velar polos intereses de Santiago, supoño que votará a favor das emendas socialistas aos orzamentos da Xunta", sostivo.
Unhas emendas que, conforme dixo, presentaron esta mesma semana e que contemplan construír un aparcadoiro á beira do Hospital Clínico, o incremento da achega para a depuradora da Silvouta, un colector de pluviais en Fontiñas, unha nova sede para a Escola Oficial de Idiomas e a ampliación do Conservatorio Profesional de Música. Tamén se inclúen partidas para a construción dun Conservatorio de Danza e a Escola Infantil de Santa Marta. A próxima semana iniciarase o debate particular das emendas parciais en 15 días procederase á votación definitiva. Unha votación na que, esperan desde as filas socialistas, o deputado Borja Verea "sexa consecuente co que dixo no pleno municipal".
