Baixa o paro un 1,63% en novembro pero tamén as afiliacións á Seguridade Social

O paro rexistrado nas oficinas dos servizos públicos de emprego baixou en 2.180 persoas en novembro en Galicia en relación ao mes anterior (-1,63%) ata os 131.168 desempregados, segundo datos que publica este venres o Ministerio de Traballo e Economía Social. Pola súa banda, a Seguridade Social perdeu 4.287 afiliados en Galicia en novembro, un 0,4%, seis veces máis que a media

Este número total de desempregados é a cifra máis baixa nun mes de novembro desde que hai rexistros. Desde o inicio da serie histórica comparable, en 1996, o paro subiu en novembro a maioría de veces en Galicia (24 veces) mentres que só baixou en tres ocasiones.

No último ano o desemprego acumula un descenso de 11.590 parados, o que supón un 8,12% menos. Por provincias, en Pontevedra, que rexistra 50.639 parados, caeu en 1.003 persoas en novembro (-1,94%) e son 4.827 menos que un ano atrás (-8,7%). Na Coruña, son 816 menos que en outubro (-1,53%) e 4.696 menos que en novembro de 2022 (-8,22%), un total de 52.433.

Mentres, Lugo contabiliza 12.571 desempregados, que son 280 menos (-2,18%) e 1.146 menos en variación anual (-8,35%) e Ourense 15.525, o que representa unha caída en 81 persoas respecto de outubro (-0,52%) e 921 menos que 12 meses antes (-5,6%).

HOMES E MULLERES

En canto a sexos, dos 131.168 desempregados rexistrados en novembro, 76.471 foron mulleres, 1.828 menos (-2,33%) e 54.697, homes, o que supón un descenso de 352 no número de desempregados respecto ao mes anterior (-0,64%).

En novembro, o paro entre os mozos menores de 25 anos baixou, con 357 parados menos que a peche do pasado mes (-6,15%), mentres que o paro das persoas con 25 anos e máis se incrementou en 1.823 desempregados (+1,43%).

Por sectores de actividade, na comunidade galega, o descenso correspóndese fundamentalmente co sector servizos (-1.621), seguido da baixada da industria (-303) e o colectivo sen emprego anterior (-386). Aumentou en 75 persoas o paro na agricultura e en 55 na construción.

Entre estranxeiros, Galicia mantén case o mesmo dato de parados que en outubro (10.651, un menos; 3.105 comunitarios e 7.546 extracomunitarios), pero son 177 máis en relación interanual.

CONTRATACIÓN

Do número de contratos rexistrados en novembro en Galicia, 57.224 contratos, un total de 39.053 foron contratos temporais e o resto, 18.171, indefinidos. No acumulado, con 675.662 contratos, a repartición é de 222.128 indefinidos, o 32,88%, e 453.534 temporais, isto é, o 67,12% restante.

SEGURIDADE SOCIAL

Tamén a Seguridade Social perdeu unha media de 4.287 cotizantes en novembro en Galicia en relación co mes anterior, o que supón unha caída do 0,4%, seis veces superior á da media estatal, segundo os datos que publica este luns o Ministerio de Inclusión, Seguridade Social e Migracións. Son, con todo, 15.958 afiliacións máis á Seguridade Social en Galicia que no penúltimo mes do ano anterior, ata situar o total en 1.063.566.

XUNTA

Pola súa banda, a Xunta destaca que Galicia rexistra a cifra máis baixa de paro nun mes de novembro desde hai 27 anos e que se sitúa como a terceira comunidade con maior caída con respecto a outubro. Así, a conselleira de Promoción do Emprego e Igualdade, Elena Rivo, sinalou que os datos de paro rexistrado "confirman a tendencia favorable dos tres últimos anos na comparativa mensual", xa que o desemprego con respecto a outubro volveu caer, do mesmo xeito que en 2021 e 2022.

REACCIÓN DOS SINDICATOS

Os sindicatos con maior representación na comunidade galega volveron a reaccionar de maneira dispar por mor dos datos do paro rexistrado que publica o Ministerio de Traballo. Así, a CIG advirte de que "a precariedade e a inestabilidade na contratación impiden garantir unha vida digna" e ve que en concreto esta situación "cébase coas mulleres, con máis contratos parciais". Pola súa banda, UXT interpreta dos números feitos públicos este luns que "dous anos despois, a reforma laboral continúa mellorando o emprego". Noutro comunicado de prensa, CC.OO. amosa a súa "preocupación" pola caída da afiliación á Seguridade Social e a "falta de políticas de emprego".

Por unha banda, a CIG advirte de que traballadores con contratos indefinidos son despedidos por non cumprir o período de proba "xa que se está empregando esta modalidade para despedir en peores condicións que cando eran eventuais, xa que non teñen dereito a indemnización".

Por outra banda, UXT sinala que "calquera reforma que afecte o subsidio por desemprego debe facerse desde o diálogo social e baixo a premisa de protexer máis e mellor aos desempregados". "Coñecer a cobertura real do sistema de protección por desemprego é o primeiro paso antes de abordar calquera reforma de maior calado no mesmo", incide.

Por último, CC.OO. indica que Galicia "leva xa dous meses cunha tendencia distinta á do conxunto do estado" e lamenta que o Goberno galego "estea máis preocupados polas eleccións autonómicas". En concreto, este sindicato censura que a Xunta, "cando non está a traballar para Feijóo, está preocupada preparando as eleccións autonómicas".