O prezo do leite repunta en Galicia en outubro tras sete meses consecutivos de caída

Os produtores galegos lácteos recibiron de media 49,1 céntimos en outubro por cada litro producido, o que supón 0,2 céntimos máis que o mes anterior. Este lixeiro repunte rompe con sete meses consecutivos de caída de prezo.

No entanto, os produtores galegos continúan á cola do país en prezos, xa que son os únicos na España peninsular que reciben menos de 50 céntimos por litro de leite. A subida de 0,2 céntimos por litro é a mesma que na media estatal, onde o prezo alcanza os 51,7 céntimos. O prezo en Galicia é catro céntimos menos que os 53,4 céntimos por litro que se pagan na veciña Asturias.

Mentres, os produtores con entregas lácteas na comunidade galega continúan á baixa, quedan en 5.730 en outubro, 31 menos que o mes anterior. En cambio, a produción elevouse a 246.030 toneladas de leite no décimo mes, isto supón case 4.000 toneladas máis que en setembro. No acumulado do ano, Galicia produce o 41% do país.

Unha vaca leiteira, da raza bovina frisoa | Fonte: Isabel Infantes - Europa Press