Un Balaídos novo no 2017
Concello e Deputación firman o acordo que garante os fondos para a reforma do estadio municipal, co obxectivo de que o 'Balaídos do século XXI' estea rematado en dous anos. Caballero pedirá axuda á Zona Franca.
Por gcdeportes | Vigo | 09/07/2015 | Actualizada ás 08:24
Tras meses e meses de tirapuxas, o Balaídos do século XXI xa dispón de fondos. Sobre o mesmo céspede, Abel Caballero e Rafael Louzán, aparcaron as súas diferenzas para firmar ao fin o convenio para a reforma integral do estadio municipal. Foi ante a atenta mirada do presidente do Celta, Carlos Mouriño, quen cualificou o día de “histórico”.
Co documento firmado este mércores, ambas institucións pactan aportar, a partes iguais, os fondos necesarios para remodelar Balaídos. En principio, Concello e Deputación aportarán 5 millóns de euros cada un, que servirán para completar as reformas de Río e Tribuna. Abel Caballero pretende implicar a outras institucións na financiación dos fondos do estadio, en especial Zona Franca para a de Marcador. O orzamento total do proxecto son 29,5 millóns e o obxectivo é que o novo Balaídos estea totalmente rematado en dous anos.
"Mañá mesmo voume poñer en contacto coa delegada da Zona Franca para que se faga cargo de Marcador, logo no 2016 xa veremos quen se ocupa da bancada de Gol”, apuntou Abel Caballero. “A tempada 2017-18 deberiase principiar co estadio totalmente renovado”, comentou o rexedor socialista, acompañado de Carmela Silva, principal candidata a presidir a Deputación de Pontevedra. Rafael Louzán firmou o convenio para a reforma de Balaídos a escasos días de deixar o seu posto na Deputación.
O club celeste salientou na súa páxina web que “o convenio garantiza a reforma integral do estadio, na que tamén participa o RC Celta coa construción da nova bancada de Preferencia, terminada no prazo anunciado”. E destaca a importancia da obra: “Un dos maiores anhelos do celtismo, a remodelación de Balaídos, é xa unha realidade grazas ao esforzo do club, das instituciones e da familia celeste ao completo. Coa unión de todos e o incansábel empuxe da afección, o Celta continúa construíndo un ilusionante proxecto de presente e futuro: #CrecemosXuntos”.
