Por Galicia Confidencial | Compostela | 28/12/2023 | Actualizada ás 15:30
Os vídeos de Nadal do PPdeG, BNG e PSdeG entraron de cheo na precampaña, ben polas súas visualizacións, pola súa creatividade ou polo seu contido político. O máis cuestionado, ata o momento, é o dos populares por ter unha chiscadela ao "me gusta la fruta" da presidenta de Madrid, Isabel Díaz Ayuso que tanto indignou ao PSOE por tentar camuflar con esa frase o "hijo de puta" que lle lanzou a Pedro Sánchez durante o debate o seu debate de investidura.
Por iso, Afonso Rueda non tivo inconveniente este xoves en pedir desculpas se o vídeo que protagoniza molestou a alguén. "Se alguén se sentiu insultado, lamentoo moito e mesmo pido desculpas, pero nin esa era a intención nin o sentimento xeral", xustificou o presidente da Xunta sobre as críticas recibidas, especialmente, por parte do PSdeG.
Deste xeito, o líder dos populares galegos volveu insistir en que o que trataba de facer con esta peza audiovisual difundida en redes sociais era unha serie de "chiscadelas" e criticou o "intento de crear crispación e tensión" a conta deste vídeo. Por iso, recomendou aos partidos da oposición que "rebaixen" a tensión. En todo caso, Rueda destacou o "éxito abrumador e inesperado" que está tendo e destacou que se fixo "con moito cariño" e " está sendo moi ben acollido". "Respecto a quen non lle guste pero pido que non se esaxere con algo desanfadado", aclarou.
OS OUTROS VÍDEOS
Ademais, o presidente galego tamén confirmou que viu os outros vídeos natalicios de BNG e PSdeG. Igual que me gusta ver os meus, non vou a xulgal os do resto porque non xulgo nin o meu". "Todos tentamos facelo ben e todo o meu respecto --para os vídeos da oposición--", dixo.
En todo caso, tamén dixo que a el, igual que ao líder do PSdeG, José Ramón Besteiro, o ten parado pola rúa xenteque non é do PP para pedirlle fotos. Aludía así ao vídeo con tomas falsas difundido polos socialistas nos que unha muller se achega a Besteiro para pedirlle unha foto aínda que lle di que ela é votante do PP. "Iso pásanos a todos e é algo bo e ten que haber tolerancia. É normal que --a xente-- se achegue a un e se alguén o quere contar nun vídeo, pois moi ben", respondeu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.