O "silencio obrigado" de Rueda despois dos Consellos da Xunta

Alfonso Rueda queda sen un dos seus principais escaparates mediaticos, as roldas de prensa posteriores ao Consello da Xunta. O presidente galego ten que autoimpoñerse un "silencio obrigado" motivado por unha denuncia ante a Xunta Electoral do PSdeG. Os socialistas devolven deste xeito un golpe anterior feito por Feijóo, quen tamén recurrira ante a Xunta Electoral Central o altofalante que Pedro Sánchez tiña nas roldas de prensa posteriores ao Consello de Ministros antes dos comicios do 23X.

Nesta cita semanal os xornalistas aproveitan para preguntarlle de todo, especialmente, e nas últimas semanas, sobre temas electorais e de máxima actualidade. Pero agora, a resolución da Xunta Electoral proíbelle ao presidente galego falar máis alá dos contidos do Consello da Xunta. Por iso, este xoves, foi moi cauto á hora de pronunciarse. "O PSOE denunciou esta rolda de prensa e por iso só podo respostar a contidos estritos do Consello", dixo. "Estou a cumprir a legalidade porque houbo un recurso que foi estimado e teño que facer o que estou facendo agora", repetiu ao insistir os informadores.

Con todo, Rueda aproveitou esa nova xuntanza semanal do seu executivo para facer anuncios que a oposición ten criticado por electoralistas, entre eles, o anuncio do pago das pensións contributivas --que o ano pasado se fixo en marzo--, os 18 millóns para infraestruturas deportivas en Ferrol, 3,8 millóns para traballos contra incendios en colaboración coa Deputación de Ourense, 4,4 millóns de subvencións para os artesáns, 1,5 en axudas a emigrantes que queiran investir en Galicia ou 2,7 millóns para os concellos que queiran "embelecer" o litoral.