18F.- Pontón asegura que Rueda non quere debater con ela porque "deixa unha xestion nefasta"

A portavoz nacional do BNG, Ana Pontón, incidiu neste primeiro día de campaña electoral na apelación a "mobilizarse" o próximo 18 de febreiro, convencida de que se isto sucede, ese mesmo día "empezará a primavera en Galicia". Con iso xa chanceara á vista das propias temperaturas máis propias desa época do ano que rexistrou Galicia na última semana e, este mesmo venres, á calor da cociña da súa casa natal. "O 18 de febreiro é o día que empezará a primavera en Galicia", proclamou no primeiro mitin de campaña, en Pontevedra, capital que goberna (en minoría) o BNG con Miguel Anxo Fernández Lores.

Xunto ao candidato por Pontevedra, Luís Bará; Ana Pontón apelou a unha mobilización "masiva" que permita pór en marcha "o mellor goberno de todos os tempos", concentrando o voto do cambio no BNG, porque "o Bloque é a alternativa real e este país precisa un goberno que achegue solucións para deixar o nefasto legado" que deixa o PP".

"Hoxe tivemos o primeiro debate electoral e Rueda non estaba; Rueda o ausente. E sabedes por que non quere debater comigo?, porque deixa unha xestión nefasta e porque deixa unha Galicia peor. E tampouco ten un proxecto ilusionante que ofrecerlle aos galegos. A súa espantada é o recoñecemento do seu fracaso", salientou. Pontón presentouse como a candidata da "maioría social que quere cambio, votase o que votase" noutras citas electorais. De feito, nunha entrevista con Europa Press, augurou que "moita xente collería a papeleta do BNG por primeira vez".

Non será o caso da súa nai, coa que arrincou esta primeira xornada electoral na casa familiar de Chorente, Sarria, nun acto tamén xunto ao seu pai. Ela, Aurita, afirmou que instruíra ''a toda a familia co voto a Pontón, aínda que recoñeceu que ela algunha vez apoiara ao PSOE, antes, apostilou, de que a súa filla se iniciase no ámbito político e de que "existise" o BNG.

A candidata do BNG á Presidencia da Xunta de Galicia, Ana Pontón, comeza a campaña electoral na súa casa familiar e natal da aldea de Chorente, en Sarria | Fonte: CARLOS CASTRO