Comeza a produción de 'Dique', unha homenaxe ás mulleres que tamén construiron o Dique da Campá de Ferrol
É unha coprodución entre Nova Galega de Danza e a Xunta.
Por E.P. | SANTIAGO DE COMPOSTELA | 03/02/2024 | Actualizada ás 16:55
O proceso de creación de 'Dique', un espectáculo de danza que a compañía Nova Galega de Danza desenvolveu en coprodución coa Xunta, comezou na sede do Centro Coreográfico Galego, na Coruña, de cara á súa estrea que terá lugar a finais do mes de xuño.
A idea creativa de partida é reflexionar sobre o papel das máis de 200 mulleres que participaron na construción do Dique da Campá de Ferrol, aproveitando o 150 aniversario do inicio da obra de enxeñaría.
A peza será dirixida escénica e escenográficamente pola directora de teatro e artista plástica Marta Pazos e a encargada da dirección coreográfica será Belén Martí. Ademais, contará cun elenco integramente feminino, que executará un diálogo entre danza tradicional e contemporánea.
PLAN DE DANZA
'Dique' chegará aos escenarios en virtude dun contrato de coprodución que segue os obxectivos marcados no Plan integral para a danza de Galicia e contará cunha escenografía versátil e autoportante, que permitirá a súa exhibición en espazos non convencionais.
O espectáculo está dirixido a todos os públicos e, á vez que o espectáculo, distribuirase unha unidade didáctica e desenvolveranse diversas actividades de mediación para o fomento e consolidación de públicos para a danza.
