Baixa o voto por correo case un 20% con respecto a hai catro anos
Correos admite case 63.000 solicitudes de voto por correo, un 18% menos
Por Europa Press / Redacción | SANTIAGO DE COMPOSTELA | 09/02/2024 | Actualizada ás 12:25
Correos admitiu case 63.000 solicitudes de voto por correo de cidadáns que desexan exercer o seu dereito por este sistema nas eleccións autonómicas ao Parlamento de Galicia, que se celebrarán o domingo 18 de febreiro.
En concreto, 45.653 peticións presentáronse de forma presencial na rede de oficinas da compañía, mentres que 17.178 de forma telemática. Estas cifras supoñen un 18,2% menos que nos comicios de 2020.
Tras comprobar a inscrición dos solicitantes no Censo, as Delegacións Provinciais da Oficina do Censo Electoral en Galicia seguen remitindo os envíos coa documentación electoral (certificado de inscrición no censo, sobres e papeletas de todas as candidaturas) á dirección indicada polo elector na solicitude, con carácter certificado e urxente. O Censo ten de prazo ata o día 11 de febreiro para facer entrega a Correos deses envíos, que seguirá póndoos a disposición dos cidadáns a medida que os reciba.
O solicitante ten de prazo ata o xoves, 15 de febreiro, para depositar o sobre co seu voto en calquera oficina de Correos en toda España, no seu horario de apertura.
