Mar comprométese coas confrarías para que poidan vender en lonxa os excedentes marisqueiros
A Federación Provincial de Pescadores de Pontevedra informa que é un acordo que chega tras varios meses de negociacións.
Por Europa Press / Redacción | PONTEVEDRA | 15/02/2024 | Actualizada ás 16:16
A Consellería do Mar comprometeu ás confrarías que regulará a venda en lonxa por parte dos depósitos de excedentes procedentes de actividades marisqueiras e recursos específicos.
Nun comunicado, a Federación Provincial de Confrarías de Pescadores de Pontevedra informa deste acordo que recolle unha "vella reivindicación do sector" despois de varios meses de negociacións coa Xunta.
Estes excedentes prodúcense nos procesos de selección e clasificación dos recursos marisqueiros previos á súa venda. Así, serán incluídos nas poxas en lonxas e o importe alcanzado será destinado a: custos de actividades de control e rastrexabilidade, compensación por diminucións de peso do marisco tras a súa extracción, perdas de peso por retirada de individuos de talla menor á regulamentaria e outros gastos.
Segundo recolle a Federación de Pontevedra, os ingresos por excedentes terán que estar debidamente contemplados nos orzamentos anuais das confrarías.
A Consellería do Mar trasladoulle que, tras varias aclaracións, esta regulación pódese levar a cabo con base na lei de confrarías de Galicia de 1993, que contempla no seu artigo 10 como posible recurso económico destas entidades calquera atribución de bens a título gratuíto realizada ao seu favor.
